Read Елизаветинская Библия, 1751 1-я Паралипоменон 18 Bible Online

1-я Паралипоменон 18 - Елизаветинская Библия, 1751 bible

1-я Паралипоменон 18

¹И бысть по сих, и порази давид иноплеменники, и прогна их: и взя геф и веси его от руки иноплеменничи.

²И порази давид моава, и бяху моавити раби давиду приносяще ему дань.

³И порази давид адраазара царя сувска во емафе, идущу ему поставити руку свою над рекою евфратом:

⁴и взя от него давид тысящу колесниц и седмь тысящ конник и двадесять тысящ мужей пешцев, и разби давид вся колесницы, и остави от них сто колесниц, (ихже удержа себе).

⁵И прииде сир от дамаска, да помощь даст адраазару царю сувску, и порази давид от сировых двадесять две тысящы мужей:

⁶и постави давид стражу в сирии, яже близ дамаска, и бяху давиду в рабы приносяще дани: и спасе Господь давида во всех, в нихже хождаше.

⁷И взя давид гривны златыя, ихже имеша раби адраазаровы, и принесе я во Иерусалим.

⁸И из метавефа и от избранных градов адраазаровых взя давид меди много зело, из неяже сотвори соломон море медяно, и столпы, и сосуды медяныя.

⁹И услыша фоа царь емафский, яко порази давид всю силу адраазара царя сувска,

¹⁰и посла адурама сына своего к царю давиду, да вопросит его, яже о мире, и благословити его о сем, яко победи адраазара и порази его, понеже муж противен бяше фоа адраазару.

¹¹И вся сосуды златыя и сребряныя и медяныя, и сия освяти царь давид Господу со сребром и златом, яже взя от всех язык, от идумеи и моава, и от сынов аммоних и от иноплеменник и от амалика.

¹²Авесса же сын саруиев порази идумею во юдоли сланей, осмьнадесять тысящ:

¹³и постави во юдоли стражу, и беша вси идумеане раби давиду. И спасаше Господь давида во всех, в нихже хождаше.

¹⁴И воцарися давид над всем израилем, и бе творя суд и правду всем людем своим.

¹⁵Иоав же сын саруиев (бысть) над воинством, и иосафат сын ахилудов памятописец,

¹⁶и садок сын ахитов и авимелех сын авиафаров священницы, и суса книгочий,

¹⁷и ванеа сын иодаев над херефием и над фелефием: сынове же давидовы первии преемницы царевы.