Read Елизаветинская Библия, 1751 1-я Паралипоменон 19 Bible Online

1-я Паралипоменон 19 - Елизаветинская Библия, 1751 bible

1-я Паралипоменон 19

¹И бысть по сих, умре наас царь сынов аммоних, и воцарися амам сын его вместо его.

²И рече давид: сотворю милость со ананом сыном наасовым, якоже сотвори отец его милость со мною. И посла давид послы на утешение ему о отце его. И приидоша отроцы давидовы в землю сынов аммоних ко анану, да утешат его.

³И рекоша началницы сынов аммоних ко анану: еда прославляя давид отца твоего пред тобою, посла к тебе утешители? никако: но да испытают град и соглядают землю, приидоша к тебе отроцы его.

⁴И взя анан рабов давидовых, и обри их, и отреза от риз их половину даже до чресл, и отпусти их.

⁵И приидоша возвестити давиду о мужех: и посла во сретение им, яко быша обезчещени зело. И рече царь: седите во иерихоне, дондеже возрастут брады вашя, и возвратитеся.

⁶И видеша сынове аммони, яко посрамлени быша людие давидовы, и посла анан и сынове аммони тысящу талант сребра, да наймут себе от сирии месопотамски, и от сирии мааха, и от сувы колесницы и конники:

⁷и наяша себе тридесять две тысящы колесниц и царя мааха и людий его: и приидоша и ополчишася прямо мидаве: и сынове аммони собрашася от градов своих и приидоша на брань.

⁸И услыша давид, и посла иоава и все воинство сильных.

⁹И изыдоша сынове аммони и ополчишася на брань при вратех градских: царие же пришедшии ополчишася особно на поли.

¹⁰И виде иоав, яко бысть на него противное лице брани сопреди и созади, и избра от всех юнош израилевых и устрои их противу сира,

¹¹и останок людий даде в руце брату своему авессе, и ополчишася противу сынов аммоних.

¹²И рече: аще укрепится сир паче мене, то будеши мне во спасение: аще же сынове аммони укрепятся паче тебе, то аз спасу тя:

¹³мужайся, и укрепимся о людех наших и о градех Бога нашего, и Господь, еже благо пред очима его, сотворит.

¹⁴И ополчися иоав и вси людие, иже с ним, противу сирян на брань, и побегоша от них.

¹⁵Сынове же аммони видеша, яко побегоша сиряне, и побегоша и они от лица авессы и от лица иоава брата его, и внидоша во град: иоав же возвратися во Иерусалим.

¹⁶И виде сир, яко победи его израиль, и посла послы: и изведоша сира, иже бе за рекою, софак же первоначалник тысящником силы адраазаровы пред ними.

¹⁷И возвещено бысть давиду, и собра весь израиль, и прейде иордан, и прииде на них, и ополчися противу их: и ополчися давид противу сира на брань и воева нань.

¹⁸И убеже сир от лица израилева, и уби давид от сира седмь тысящ колесниц и четыредесять тысящ пешцев, и софака первоначалника силы уби.

¹⁹И видеша раби адраазаровы, яко падоша от лица израилева, и прибегоша к давиду, и служаху ему: и не восхоте сир помогати сыном аммоним ктому.