Read Елизаветинская Библия, 1751 1-я Паралипоменон 26 Bible Online

1-я Паралипоменон 26 - Елизаветинская Библия, 1751 bible

1-я Паралипоменон 26

¹Разделение же дверников: сынове кореовы, моселлемиа сын кореов от сынов асафовых.

²Сынове же моселлемии: захариа первенец и иадиил вторый, завадиа третий и иафанаил четвертый,

³олам пятый, ионафан шестый, елионай седмый, авдедом осмый.

⁴Авдедому же сынове: самиа первенец, иозаваф вторый, иоаф третий, сахар четвертый, рофануил пятый,

⁵амиил шестый, иссахар седмый, фелафий осмый, яко благослови его Бог.

⁶Семею же сыну его рождени суть сынове первенца началницы в дому отечестем его, бяху бо сильни.

⁷Сынове семеиевы: офни и рафаил, и овид и елзавад и ахиа, сынове сильни, елиу и савахиа и исваком.

⁸Вси тии от сынов авдедомлих, сии и сынове их и братия их труждающеся крепко в делании, вси шестьдесят два авдедому.

⁹Моселлемию же сынове и братия осмьнадесять, сильнии.

¹⁰Осе же от сынов мерариных сынове стрегущии начало, понеже не бысть ему первенец: и постави его отец его в началника разделения втораго:

¹¹хелкиа вторый, тавелиа третий, захариа четвертый: вси сии сынове и братия осины тринадесять.

¹²Сии разделени суть в дверницы, да началствуют над сильными чреды, якоже и братия их служити в дому Господни.

¹³И метнуша жребия на коегождо мала и велика по домом отечеств своих на каяждо врата:

¹⁴и паде жребий сущих на востоки селемию и захарии. Сынове соазовы мелхии метнуша жребия, и паде жребий к северу.

¹⁵Авдедому к югу прямо дому есефима.

¹⁶Во второе осе к западу по вратех притвора восхождения, стража противу стражи.

¹⁷Ко востоку по шести на день: к северу четыре на день: к полудни на день четыре: и к дому совета по два пременяющеся.

¹⁸И осе к западу по вратех притвора три, стражба противу стражбы восхождения к востоком, по шести на день, и на север по четыре, и к югу четыре, и к дому совета два пременяющеся, и к западу четыре, и к стези два пременяющеся.

¹⁹Сия разделения дверником сыном кореовым и сыном мерариным.

²⁰Левити же братия их (беша) над сокровищи дому Господня и над сокровищи святынь.

²¹Сынове ладановы, сии сынове герсони: ладану началницы отечеств ладаних, герсону иеиил.

²²Сынове иеиили земеф и иоиль братия над сокровищи дому Господня,

²³амвраму и иссаару, хеврону и озиилу.

²⁴Суваил же сын гирсама сына моисеова настоятель над сокровищи.

²⁵Брату же его елиезеру равиа сын его, и иосиа и иорам, и зехрий и саломоф.

²⁶Той саломоф и братия его над всеми сокровищи святыми, ихже освяти давид царь и началницы отечеств, тысящницы и сотницы и вождеве силы,

²⁷яже взя из градов и от корыстей, и освяти я на пособление зданию дому Господня.

²⁸И над всеми, яже освяти Богу самуил пророк и саул сын кисов, и авенир сын ниров и иоав сын саруиев, все еже освятиша рукою саломофовою и братии его.

²⁹Иссаарию хонениа и сынове его делания внешняго над израилем, к наказанию и суждению.

³⁰Хеврону асавиа и братия его сынове сильнии, тысяща и седмь сот над созиранием израиля за иорданом противу запада, на всякую службу Господню и на делание царево.

³¹Хеврону уриа началник хевронитов по родом их, по отечеством, в четыредесятое лето царства давидова сочтени суть, и обретени мужие сильни в них во иазире галаадитстем.

³²И братия его сынове сильнии, две тысящы седмь сот, началницы отечеств, и постави их давид царь над рувимом и гадом и над половиною колена манассиина, во всякое повеление Господне и слово царево.