Read Елизаветинская Библия, 1751 2-я Паралипоменон 12 Bible Online

2-я Паралипоменон 12 - Елизаветинская Библия, 1751 bible

2-я Паралипоменон 12

¹И бысть егда устроися царство ровоамово, и укрепися, остави заповеди Господни, и весь израиль с ним.

²И бысть в лето пятое царства ровоамля взыде сусаким царь египетский на Иерусалим, зане согрешиша пред Господем,

³с тысящию и двема сты колесниц и шестьдесят тысящ конник, и не бе числа народу пришедшему с ним от египта, ливиане, троглодитяне и ефиопляне:

⁴и взяша грады крепкия, иже бяху во иуде, и приидоша даже до Иерусалима.

⁵Самеа же пророк вниде к ровоаму и к началником иудиным, иже собрани бяху во Иерусалим от лица сусакимова, и рече к ним: сия рече Господь: вы остависте мя, и аз оставлю вас в руку сусакима.

⁶И посрамишася началницы израилевы и царь и рекоша: праведен Господь.

⁷Егда же виде Господь, яко смиришася, и бысть слово Господне к самею, глаголя: смиришася, не разорю их, и дам им вмале спасение, и не уканет ярость моя на Иерусалим,

⁸обаче будут в рабы, да познают работу мою и работу царства земли.

⁹И взыде сусаким царь египетский во Иерусалим, и взя сокровища, яже в дому Господни, и сокровища, яже в дому цареве, вся взя: и взя щиты златыя, ихже сотвори соломон.

¹⁰И сотвори царь ровоам щиты медяны вместо их. И постави на ним сусаким царь египетский началников предходящих стрегущих врата царева:

¹¹и бысть внегда входити царю в дом Господень, вхождаху стрегущии и предходящии, и обращающеся восхождаху предходящии ко оружехранителнице своей.

¹²И егда смирися той, отвратися от него ярость Господня, а не в разорение в конец: ибо и во иуде бяху словеса блага.

¹³И укрепися царь ровоам во Иерусалиме и царствова: четыредесяти же и единаго лета бысть ровоам, егда царствовати нача, и седмьнадесять лет царствова во Иерусалиме, во граде, егоже избра Господь, да именуется имя его ту от всех колен израилевых. Имя же матери его ноома амманитыня.

¹⁴И сотвори лукавое, яко не исправи сердца своего, да взыщет Господа.

¹⁵Словеса же ровоамова первая и последняя не се ли, суть писана в словесех самеа пророка и адда провидящаго, и деяния его? И воеваше ровоам и иеровоам во вся дни.

¹⁶И умре ровоам и погребен бысть со отцы своими во граде давидове. И воцарися авиа сын его вместо его.