Read Елизаветинская Библия, 1751 2-я Паралипоменон 17 Bible Online

2-я Паралипоменон 17 - Елизаветинская Библия, 1751 bible

2-я Паралипоменон 17

¹И воцарися иосафат сын его вместо его, и укрепися иосафат над израилем:

²расположи же силу во всех градех иудиных крепких и постави воеводы во градех иудиных и во градех ефремовых ихже побра прежде аса отец его.

³И бысть Господь со иосафатом, яко хождаше в путех давида отца своего первых и не взыска идолов,

⁴но Господа Бога отца своего взыска и пойде в повелениих отца своего, а не по делом израилевым:

⁵и укрепи Господь царство в руку его, и даша вся иудеа дары иосафату, и бысть ему богатство и слава многа.

⁶И вознесеся сердце его в пути Господни, и ктому изя высокая и дубравы от земли иудины.

⁷В третие же лето царства своего посла началники своя и сынов сильных авдию и захарию, и нафанаила и михеа, да учат во градех иудиных:

⁸и с ними левити самеа и нафаниа, и завдиа и асиил, и семирамоф и ионафан, и адониа и товиа и товадониа левити, и с ними елисама и иорам жерцы:

⁹учаху же во иудеи, имеюще книгу закона Господня, и прохождаху грады иудины и учаху люди.

¹⁰И бысть страх Господень на всех царствах земных окрест иуды, и не воеваша противу иосафата.

¹¹И от иноплеменник иосафату дары приношаху сребро и дани: арави же привождаху ему овнов овчих седмь тысящ и седмь сот, и козлов седмь тысящ седмь сот.

¹²И бе иосафат предуспевая велик в высоту и созда во иудеи домы и грады крепки.

¹³И многа дела быша ему во иудеи: и мужие ратницы крепцы сильнии во Иерусалиме.

¹⁴И сие число их по домом отечеств их: и во иуде тысященачалницы еднас вождь и с ним сынове сильнии силы триста тысящ:

¹⁵и по нем иоанан началник и с ним двести осмьдесят тысящ:

¹⁶по немже амасиа, сын захариин, усердсвуяй Господу и с ним двести тысящ мужей сильных.

¹⁷И от вениаминя сильнии силы елиад, и с ним держащих лук и щиты двести тысящ сильных:

¹⁸и по нем иозавад, и с ним сто осмьдесят тысящ, сильнии ко брани.

¹⁹Сии служащии царю, кроме оных, ихже постави царь по градом крепким во всей иудеи.