Read Елизаветинская Библия, 1751 2-я Паралипоменон 19 Bible Online

2-я Паралипоменон 19 - Елизаветинская Библия, 1751 bible

2-я Паралипоменон 19

¹И возвратися иосафат царь иудин в дом свой мирно во Иерусалим.

²И изыде во сретение ему ииуй сын ананиин пророк и рече к нему: царю иосафате, нечестиву ли даеши помощь, или ненавидимому от Господа дружиши? И рече ему ииуй: сего ради бысть на тя гнев Господень:

³но токмо дела благая обретошася в тебе, зане отял еси кумиры от земли иудины и исправил еси сердце твое взыскати Господа.

⁴И вселися иосафат во Иерусалиме, и паки изыде к людем от вирсавеи даже до горы ефремли, и возврати их ко Господу Богу отец своих.

⁵И постави судии во всех градех иудиных крепких, во всяцем граде,

⁶и рече судиям: видите, что вы творите, не человеческий бо вы суд творите, но Господень, и с вами словеса суда:

⁷и ныне да будет страх Господень на вас, и храните и творите, яко несть у Господа Бога нашего неправды, ниже дивления лицу, ни приятия мзды.

⁸Во Иерусалиме же постави иосафат левитов и священников и отценачалников от израиля в суд Господень, да судят живущих во Иерусалиме.

⁹Повеле же им, глаголя: тако творите во страсе Господни, во истине и сердцем совершенным:

¹⁰всякую распрю, яже приидет к вам, братий ваших обитающих во градех своих, между кровию крове, и между повелением и заповедию, и оправданьми и судбами, разсудите им, да не согрешают Господеви, и не приидет гнев на вас и на братию вашу: тако творите и не согрешите:

¹¹и се амариа, священник вождь над вами во всяко слово Господне: и завдиа сын исмаиль вождь в дому иудине во всякому слову цареву: и книжницы и левити пред вами: укрепитеся и творите, и будет Господь со благим.