Read Елизаветинская Библия, 1751 2-я Паралипоменон 2 Bible Online

2-я Паралипоменон 2 - Елизаветинская Библия, 1751 bible

2-я Паралипоменон 2

¹И повеле соломон созидати дом имени Господню и дом царству своему.

²И собра царь соломон седмьдесят тысящ мужей носящих времена и осмьдесят тысящах каменосечцев в горах, приставленных же над ними три тысящы и шесть сот.

³И посла соломон к хираму царю тирску, глаголя: якоже сотворил еси с давидом отцем моим и послал еси ему кедры, да созиждет себе дом, в немже ему обитати,

⁴и се, аз сын его созидаю дом имени Господа Бога моего, да освяшу его ему, еже кадити пред ним фимиам ароматов и предложение всегда, и возносити всесожжения выну, утро и к вечеру, и в субботы, и в новомесячиих, и в праздницех Господа Бога нашего: во век сие бо израили:

⁵и дом, егоже аз созидаю, велик, велик бо есть Господь Бог наш паче всех богов,

⁶и кто возможет создати ему дом? аще бо небо и небо небесе не могут вместити славы его: и кто аз, созидаяй ему дом? но токмо еже кадити фимиам пред ним:

⁷ныне убо посли мне мужа мудра, иже весть дела творити в злате и сребре, и меди и железе, и порфире и в червлени и в синете, и иже знает ваяти ваяние, с мудрыми, иже у мене во иудеи и во Иерусалиме, яже уготова давид отец мой:

⁸и посли ми древа кедрова и аркевфова и певгова от ливана, вем бо аз, яко раби твои умеют сещи древа от ливана:

⁹и се, раби твои с рабы моими пойдут, да уготовают мне древа многа, дом бо, егоже аз созидаю, велик и преславен:

¹⁰и се, делателем, иже секут древа, дах в пищу рабом твоим пшеницы мер двадесять тысящ и ячменя мер двадесять тысящ, и вина мер двадесять тысящ и елеа мер двадесять тысящ.

¹¹Рече же хирам царь тирский чрез писание и посла к соломону, глаголя: понеже возлюби Господь люди своя, постави тя над ними царя.

¹²И рече хирам: благословен Господь Бог израилев, иже сотвори небо и землю, иже даде давиду царю сына премудра и учена, и умна и разумна, иже созиждет дом Господу и дом царству своему:

¹³и ныне послах тебе мужа мудра и сведуща разум, хирама раба моего:

¹⁴матерь его от дщерей дановых, отец же его муж тирянин, иже весть делати в злате и сребре, и в меди и в железе, и в камениих и в древах, и ткати в порфире и в синете и в виссоне и в червленице, и ваяти всякую резь, и разумети всяко разумение, елика аще даси ему, с мудрыми твоими и с мудрыми господина моего давида, отца твоего:

¹⁵и ныне пшеницу и ячмень, и елей и вино, яже обещал еси, господине мой, посли рабом твоим,

¹⁶мы же будем сещи древа от ливана на всяку потребу твою и послем я плотами по морю иоппийскому, ты же приведеши я во Иерусалим.

¹⁷И собра соломон всех мужей пришелцев, иже бяху в земли израилеве, по сочтению, имже сочте их давид отец его, и обретени суть сто пятьдесят три тысящы и шесть сот:

¹⁸сотвори же от них седмьдесят тысящ бременоносцев и осмьдесят тысящ каменосечцев, три тысящы и шесть сот приставники над делами людскими.