Read Елизаветинская Библия, 1751 2-я Паралипоменон 26 Bible Online

2-я Паралипоменон 26 - Елизаветинская Библия, 1751 bible

2-я Паралипоменон 26

¹И взяша вси людие иудины (сына его) озию, он же бе лет шестинадесяти, и поставнша его царем вместо амасии отца его.

²Той созда елаф, той возврати его иуде по успении царя со отцы его.

³Шестинадесяти лет бысть озиа, егда царствовати нача, и пятьдесят два лета царствова во Иерусалиме. Имя же матери его иехелиа от Иерусалима.

⁴И сотвори правое пред Господем по всем, елика сотвори амасиа отец его,

⁵и бе взыская Господа во дни захарии разумеющаго во страсе Господни, и во дни его взыска Господа, и благопоспеши ему Господь.

⁶И изыде, и ополчися противу иноплеменников, и разори стены гефски и стены иавнира и стены азота и созда грады азотски и во иноплеменницех.

⁷И укрепи его Господь противу иноплеменников и противу аравов, иже обитаху в камениих, и противу минеов.

⁸И даша минее дары озии, и прослы имя его даже до входа египетскаго, понеже укрепися до высоты.

⁹Созда же озиа столпы во Иерусалиме и над враты угла и над враты юдольными и над углами, и укрепи их:

¹⁰и устрои столпы в пустыни, и ископа кладязи многи, понеже имяше многи скоты на поли и в пустыни, и делатели виноградов на горах и на кармиле, бе бо муж любоземледелен.

¹¹Бысть же озии сила творящая брань, и исходящая к ополчению на брань, и входящая на ополчение в число: и бе число их под рукою иеиля писаря и маасии судии и под рукою анании наместника царска.

¹²Все число отечеств началников сильных на брань две тысящы шесть сот,

¹³и с ними силы военныя триста седмь тысящ и пять сот: сии творяху брань в силе крепце, помогающе царю противу супостат.

¹⁴Уготова же им озиа всей силе щиты и копия, и шлемы и броня, луки же и пращы на метание камения.

¹⁵И сотвори во Иерусалиме хитрости ухищреныя вымыслом, еже быти им на столпех и на углех, да мещут стрелы и камения велия: и слышано бысть устроение его до далеча, понеже удивлен бысть ищя помощи (от Господа), дондеже укрепися.

¹⁶И егда укрепися, вознесеся сердце его на пагубу (свою): и обиде Господа Бога своего, и вниде в церковь Господню покадити над олтарем фимиамов.

¹⁷И вниде по нем азариа священник и с ним священницы Господни осмьдесят, сынове сильнии.

¹⁸И сташа противно озии царю и рекоша ему: несть твое, озие, да кадиши фимиамом Господеви, но токмо священником сыном аароним освященным кадити: изыди из святилища, яко отступил еси от Господа: и не вменится тебе сие во славу от Господа Бога.

¹⁹И прогневася озиа, и в руку его кадилница еже кадити во храме: и внегда разярися он на жерцы Господни, и проказа взыде на чело егоже пред священники в дому Господни, на олтари фимиамнем.

²⁰И обратися к нему азариа архиерей и священницы, и се, той прокажен на челе своем, и изгнаша его оттуду, ибо и сам тщашеся изыти, яко обличи его Господь.

²¹Бысть же озиа царь прокажен даже до дне смерти своея и седяше в дому отлучене прокажен, понеже отторжен бысть от дому Господню: иоафам же сын его бе над царством его судя людем земли.

²²Прочая же словеса озии первая и последняя написана у исаии сына амосова пророка.

²³И успе озиа со отцы своими, и погребоша его со отцы его в поли царских гробов, зане реша, яко прокажен бысть. И воцарися иоафам сын его вместо его.