Read Елизаветинская Библия, 1751 2-я Паралипоменон 29 Bible Online

2-я Паралипоменон 29 - Елизаветинская Библия, 1751 bible

2-я Паралипоменон 29

¹И езекиа нача царствовати сый двадесяти и пяти лет, и двадесять девять лет царствова во Иерусалиме. Имя же матери его авиа, дщерь захариина.

²Сотвори же правое пред Господем по всем, яже сотвори давид отец его.

³И бысть егда ста на царстве своем в месяц первый, отверзе двери дому Господня и обнови их,

⁴и введе священники и левиты, и постави их на стране яже к востоку,

⁵и рече им: послушайте мя, левити, ныне очиститеся и очистите дом Господа Бога отец наших, и изрините нечистоту из святилища:

⁶яко отступиша отцы наши и сотвориша лукавое пред Господем Богом нашим, и оставиша его, и отвратиша лице свое от скинии Господни, и даша хребет,

⁷и заключиша врата храма, и погасиша светилники, и фимиамом не кадиша, и всесожжений не принесоша во святилищи Богу израилеву:

⁸и разгневася яростию Господь на иуду и на Иерусалим, и предаде их во ужас и погубление и на звиздание, якоже вы видите очима вашима:

⁹и се, поражени быша отцы наши мечем, и сынове наши и дщери нашя и жены нашя в пленении в земли не своей, якоже и ныне суть:

¹⁰ныне убо положите на сердца ваша, еже завещати завет с Господем Богом израилевым, и отвратит гнев ярости своея от нас:

¹¹и ныне не пренебрегайте, яко вас избра Господь стояти пред ним, служити ему, и да будете ему служаще и кадяще.

¹²И восташа левити, маал сын амасиев и иоиль сын захариев от сынов каафовых, и от сынов мерариных кис сын авдиев и азариа сын илаелилов, и от сынов гедсоних иоадад сын земмань и иоадам, сии сынове иоахаини:

¹³от сынов елисафаних самарий и иеиил, и от сынов асафовых захариа и матфаниа,

¹⁴и от сынов еманих иеиил и семей, от сынов же идифумлих самафиа и озиил:

¹⁵собраша же братию свою и освятишася по заповеди цареве повелением Господним, да очистят дом Божий:

¹⁶и внидоша священницы внутрь церкве Господни, да очистят ю, и извергоша всю нечистоту обретенную в дому Господни и во дворе дому Господня: и вземше левити, изнесоша к потоку кедрску вон.

¹⁷И начаша в первый день новомесячия перваго месяца очищати, и в день осмый того месяца внидоша во храм Господень, и очистиша церковь Господню во осми днех, и в день шестыйнадесять месяца перваго совершиша.

¹⁸И внидоша внутрь ко езекии царю и рекоша: очистихом вся, яже в дому Господни, олтарь всесожжения и сосуды его, и трапезу предложения со всеми сосуды ея,

¹⁹и вся сосуды, яже оскверни царь ахаз в царство свое во отступлении своем, уготовахом и очистихом, и се, суть пред олтарем Господним.

²⁰И воста рано езекиа царь, и собра началники града, и взыде в дом Господень,

²¹и вознесе телцев седмь и овнов седмь, агнцев седмь и козлов от коз седмь за грех, за царство и за святилище и за израиля, и рече сыном аароним священником, да взыдут на олтарь Господень жрети телцев.

²²И заклаша телцев, и взяша кровь священницы и излияша на олтарь: и заклаша овнов и кровь на олтарь возлияша: и заклаша агнцев и облияша кровию олтарь:

²³и приведоша козлов, иже за грех, пред царя и церковь, и возложиша руки своя на них,

²⁴и пожроша их священницы, и покропиша кровию их пред олтарем, и помолишася о всем израили: зане рече царь, о всем израили всесожжение и яже о гресе.

²⁵Постави же левиты в дому Господни с кимвалы и псалтирми и гусльми, по заповеди давида царя и гада провидца царю и нафана пророка, яко по заповеди Господней повеление (бысть) рукою пророков его.

²⁶Сташа же левити со органы давидовы и священницы с трубами.

²⁷И повеле езекиа, да вознесут всесожжение на олтарь: и егда начаша возносити всесожжение, начаша хвалы пети Господеви и трубити при органех давида царя израилева.

²⁸И вся церковь покланяшеся, и певцы пояху, и трубы трубяху, дондеже совершися всесожжение.

²⁹Егда же скончаша приношение, преклонися царь и вси иже бяху с ним и поклонишася Господеви.

³⁰Побеле же езекиа царь и князи левитом, да восхвалят Господа словесы давидовыми и асафа пророка: иже восхвалиша в веселии, и падоша, и поклонишася Господеви.

³¹И отвеща езекиа и рече: ныне исполнисте руки вашя Господу, приведите и принесите жертвы хваления в дом Господень. И принесе (все) собрание жертвы и хвалы в дом Господень, и всяк усердный сердцем всесожжения.

³²И бысть число всесожжения, еже принесе собрание, телцев седмьдесят, овнов сто, агнцев двести, вся сия во всесожжение Господеви:

³³освященных же телцев шестьсот, овец три тысящы.

³⁴Но священницы не мнози бяху и не можаху одирати кож всесожжения, и помогоша им братия их левити, дондеже исполнися дело и дондеже освятишася жерцы, левити бо усерднее освятишася, нежели священницы:

³⁵всесожжения же много в туках совершения спасения, и возлияний всесожжения: и исправися дело в дому Господни.

³⁶Возвеселися же езекиа и вси людие, яко уготова Бог людем, понеже внезапу бысть слово.