Read Елизаветинская Библия, 1751 2-я Паралипоменон 36 Bible Online

2-я Паралипоменон 36 - Елизаветинская Библия, 1751 bible

2-я Паралипоменон 36

¹И взяша людие земли иоахаза сына иосиина, и помазаша его, и поставиша его царем вместо отца его во Иерусалиме.

²Двадесяти триех лет бысть иоахаз, егда царствовати нача, и три месяцы царствова во Иерусалиме. Имя же матере его амитал, дщерь иеремиина от ловны. И сотвори лукавое пред Господем по всем, яже сотвориша отцы его. (И плени иоахаза,) и окова его фараон нехао в девлафе в земли ефамли, еже не царствовати ему во Иерусалиме,

³и преведе его царь во египет, и возложи дань на землю (израилеву) сто талант сребра и талант злата.

⁴И постави фараон нехао елиакима сына иосиина царем над иудою и Иерусалимом вместо иосии отца его, и премени имя его иоаким. Иоахаза же брата его взя фараон нехао и введе его во египет, и умре тамо: сребро же и злато даде фараону. Тогда нача земля поддана быти, еже даяти сребро по словеси фараонову: и кийждо по силе истязаше сребро и злато от людий земли, еже даяти фараону нехао.

⁵Двадесяти пяти лет бе иоаким, егда царствовати нача, и единонадесять лет царствова во Иерусалиме. Имя же матере его зехора, дщерь нириева от рамы. Сотвори же лукавое пред Господем по всем, елика сотвориша отцы его. Во дни его прииде навуходоносор царь вавилонский на землю, и бе ему служа три лета и отступи от него. И посла Господь на них халдеи и разбойники с¦рския и разбойники моавитския, и сынов аммоновых и самарийских, и по словеси сем отступиша по словеси Господню, (еже глагола) усты рабов своих пророков. Обаче ярость Господня бе на иуде, еже отринути его от лица своего, грех ради манассииных во всех, яже сотвори, и в крови неповинней, юже излия иоаким, и наполни Иерусалим крове неповинныя. Но не восхоте Господь искоренити их.

⁶И взыде на него навуходоносор царь вавилонский, и окова его оковами медяными, и приведе его в вавилон:

⁷и часть сосудов дому Господня пренесе в вавилон и постави я во храме своем в вавилоне.

⁸Прочая же словес иоакимовых, и вся, яже содела, не се ли, сия писана в книзе словес дний царей иудиных? И успе иоаким со отцы своими и погребен бысть в ганозане со отцы своими. И воцарися иехониа сын его вместо его.

⁹Осминадесяти лет бе иехониа, егда царствовати нача, и три месяцы и десять дний царствова во Иерусалиме, и сотвори лукавое пред Господем.

¹⁰Егда же лету круг вращашеся, посла навуходоносор царь, иже и введе его в вавилон с предрагими сосуды дому Господня, а царем постави седекию брата отцу его над иудою и Иерусалимом.

¹¹Двадесять едино лето бысть седекии, егда царствовати нача, единнадесять лет царствова во Иерусалиме:

¹²и сотвори лукавое пред Господем Богом своим, и не усрамися лица иеремии пророка от уст Господних,

¹³егда от царя навуходоносора отвержеся, иже закля его пред Богом: и ожесточи выю свою и сердце свое укрепи, да не обратится ко Господу Богу израилеву.

¹⁴И вси славнии иудины и священницы и людие земли умножиша еже преступити преступления мерзостей языческих, и оскверниша дом Господень, иже во Иерусалиме.

¹⁵И посылаше Господь Бог отец их к ним рукою пророков своих утренюя и посылая вестники своя, понеже щадяше людий своих и святилища своего: и тии поношаху послом Божиим,

¹⁶и уничижаху словеса его, и ругахуся пророком его, дондеже сниде гнев Господень на люди его, дондеже не бысть изцеления.

¹⁷И наведе на них царя халдейска, и поби младенцы их мечем в дому святыни его: и не пощаде седекии и дев их не помилова, и старцы их изведе, и всех предаде в руки их,

¹⁸и вся сосуды дому Божия великия и малыя, и сокровища церкве Господни, и вся сокровища царева и вельмож, вся внесе в вавилон:

¹⁹и зажже дом Господень и разори стену Иерусалимлю, и столпы его сожже огнем и всяк сосуд драгий истни:

²⁰и пресели оставшихся в вавилон, и быша ему и сыном его в рабы даже до царства мидскаго,

²¹да исполнится слово Господне устами иеремии, донележе прия земля субботы своя субботствовати во вся дни запустения своего: субботствова до совершения седмидесяти лет.

²²В лето первое кира царя персскаго, повнегда исполнитися словесем Господним усты иеремии, воздвиже Господь дух кира царя персскаго, и повеле проповедати во всем царствии своем писанием, глаголя:

²³сия глаголет кир царь персский: вся царства земли даде ми Господь Бог небесный, и той заповеда мне создати себе дом во Иерусалиме, иже есть во иудеи: кто в вас от всех людий его? да будет Бог его с ним, и да взыдет.