Read Елизаветинская Библия, 1751 2-я Паралипоменон 4 Bible Online

2-я Паралипоменон 4 - Елизаветинская Библия, 1751 bible

2-я Паралипоменон 4

¹Сотвори же и олтарь медян, двадесять лакот в долготу и двадесять лакот в широту и десять лакот в высоту.

²И сотвори море (медяно) слияно, десять лакот от устия до устия его, кругло окрест, и пяти лакот в высоту, и округлость его тридесяти лактей:

³и подобие телцев под ним окрест окружающих е: десять лакот обдержаху умывалницу окрест: два рода слияша телцев в слиянии их,

⁴имже сотвориша их дванадесять телцев, иже трие сматряху к северу и трие к западу, и трие к полудню и трие к востоку, и море на них (наставлено), задняя же их бяху внутрь (под морем):

⁵и толстота его дланная, и устие его яко устие потира, изваянна яко отрасли крина, вмещающее три тысящы мер: и соверши.

⁶Сотвори же омывалниц десять и постави пять одесную и пять ошуюю, да омывают в них вся приносимая на всесожжения и очищают в них, море же, да омываются священницы в нем.

⁷Сотвори же и подсвещник златых десять по мере их и постави я в храм пять одесную и пять ошуюю.

⁸И сотвори столов десять и постави в храм пять одесную и пять ошуюю, и фиал златых сотвори сто.

⁹И сотвори двор священником и двор великий, и двери двора и вереи их помедяны медию.

¹⁰И море постави от угла дому одесную аки к востоку прямо.

¹¹Сотвори же хирам удицы мясныя, и кадилницы, и сковраду жертвенную, и вся сосуды его: и соверши хирам творити всякое дело, еже сотвори соломону царю в дому Божии:

¹²столпа два, и на них окружилия, и венцы на главах дву столпу, и мрежице две, еже покрывати главы венцев иже суть над главами столпов:

¹³и звонцев златых четыреста в две мрежи, и два ряда шипков во мрежи единей, еже покрывати два окружилия венцев, иже суть верху столпов:

¹⁴и подставов сотвори десять, и умывалницы сотвори на подставах,

¹⁵и море едино и волов дванадесять под ним,

¹⁶и котлы, и удицы мясныя и вся сосуды их, яже сотвори хирам и принесе царю соломону в дом Господень от меди чистыя.

¹⁷Во стране иордана слия их царь, в толщи земней, между сокхофом и между саридафом.

¹⁸И сотвори соломон вся сосуды сия многочисленны зело, понеже не оскуде тягость меди.

¹⁹Сотвори же соломон вся сосуды дому Божия, и олтарь злат, и трапезы, и на них хлебы предложения,

²⁰и подсвещники, и светилники света, да светят пред святая святых по чину, от злата чиста,

²¹и щипцы их, и светилники их, и фиалы, и чашицы, и кадилницы от злата чиста,

²²и двери храма внутренния яже во святая святых и двери дому храма златыя. И совершися все дело еже сотвори соломон в дому Господни.