Read Елизаветинская Библия, 1751 2-я Паралипоменон 5 Bible Online

2-я Паралипоменон 5 - Елизаветинская Библия, 1751 bible

2-я Паралипоменон 5

¹И внесе соломон святая давида отца своего, сребро и злато и вся сосуды, и даде в сокровище дому Господня.

²Тогда собра соломон вся старейшины израилевы и вся началники колен, вожды отечеств сынов израилевых во Иерусалим, да вознесут кивот завета Господня от града давидова, иже есть сион.

³И собрашася ко царю вси мужие израилевы в праздник, сей есть месяц седмый.

⁴И приидоша вси старейшины израилевы, и взяша вси левити кивот

⁵и внесоша его и скинию свидения и вся сосуды святыя, иже в скинии, и внесоша его священницы и левити.

⁶Царь же соломон и весь сонм сынов израилевых, и боящиися и собрании пред кивотом, жряху телцы и овцы безчисленны и несочисляемы от множества.

⁷И внесоша священницы кивот завета Господня на место его, еже есть молитвенник храма, во святая святых, под криле херувимов.

⁸И бяху херувими распростерше крила своя над местом кивота, и покрываху херувими над кивотом и над носилами его свыше.

⁹И длиннее бяху носила, и видяхуся главы носил от святых в лице молитвенника, и не видяхуся вне, и быша тамо даже до настоящаго дне.

¹⁰Ничтоже бе в кивоте, токмо две скрижали, ихже положи моисей в хориве, егда закон даде Господь сыном израилевым, исходящым им из земли египетския.

¹¹И бысть исходящым священником от святых, вси бо священницы, иже ту обретошася, освящени быша и не бяху расположени в дневную чреду,

¹²левити же и певцы вси с сынми асафовыми, со еманом, идифумом, и с сынми их и с братиями их, облечени в ризы льняны, в кимвалех и псалтири и гуслех (возглашаху) стояще пред олтарем, и с ними жерцев сто двадесять трубяще трубами:

¹³и бысть един глас в трублении и в псалмопении и в возглашении гласом единым еже хвалити и исповедатися Господеви. И егда воздвигоша глас в трубах и кимвалех и органех песней, и глаголаху: исповедайтеся Господеви, яко благ, яко в век милость его: и дом исполнися облака славы Господни,

¹⁴и не могоша священницы стати служити от лица облака, наполни бо слава Господня дом Божий.