Read Елизаветинская Библия, 1751 2-я Паралипоменон 6 Bible Online

2-я Паралипоменон 6 - Елизаветинская Библия, 1751 bible

2-я Паралипоменон 6

¹Тогда рече соломон: Господь рече обитати во мгле,

²аз же создах дом имени твоему святый тебе, и уготован еже обитати тебе во веки.

³И обрати царь лице свое и благослови все собрание израилево, и все собрание израилево предстояше, и рече:

⁴благословен Господь Бог израилев, якоже глагола усты своими ко давиду отцу моему, и руками своими соверши, глаголя:

⁵от дне, в оньже изведох люди моя от земли египетския, не избрах града от всех колен израилевых, да созиждется в нем дом имени моему ту, ниже избрах мужа быти вождем над людьми моими во израили:

⁶но избрах Иерусалима, да будет имя мое в нем, и избрах давида быти над людьми моими израилем:

⁷и бысть на сердцы давида отца моего создати дом имени Господа Бога израилева:

⁸и рече Господь ко давиду отцу моему: понеже бысть на сердцы твоем создати дом имени моему, добре сотворил еси, яко бысть на сердцы твоем,

⁹обаче ты не созиждеши мне дому, но сын твой, иже изыдет из чресл твоих, той созиждет дом имени моему:

¹⁰и соверши Господь слово сие, еже глагола, и бых вместо давида отца моего, и седох на престоле израилеве, якоже глагола Господь, и создах дом имени Господа Бога израилева,

¹¹и поставих в нем кивот, в немже есть завет Господень, егоже завеща израилю.

¹²И ста пред олтарем Господним, пред всем множеством израилевым, и простре руце свои:

¹³сотвори бо соломон стояло медяно и постави его посреде двора святилища, пять лакот долгота его и пять лакот широта его и три лакти высота его: и ста на нем, и паде на колена своя пред всем множеством израилевым, и простре руки своя на небо и рече:

¹⁴Господи Боже израилев, несть подобен тебе Бог на небеси и на земли, сохраняяй завет и милость с рабы твоими, иже ходят пред тобою всем сердцем своим,

¹⁵яже сохранил еси рабу твоему давиду отцу моему, елика рекл еси ему глаголя, и глаголал еси усты твоими и руками твоими совершил еси, якоже день сей:

¹⁶и ныне, Господи Боже израилев, сохрани рабу твоему давиду отцу моему, яже рекл еси ему глаголя, и глаголал еси усты твоими и исполнил еси якоже в день сей, глаголя: не оскудеет тебе муж от лица моего седяй на престоле израилеве, токмо аще сохранят сынове твои пути моя ходити в законе моем, якоже ходил еси предо мною:

¹⁷и ныне, Господи Боже израилев, да укрепится слово твое, еже глаголал еси рабу твоему давиду:

¹⁸убо истинно ли Бог обитати будет с человеки на земли? аще небо и небо небесе не довлеют ти, и кольми паче дом сей, егоже создах?

¹⁹и призри на моление раба твоего и на молитву мою, Господи Боже мой, еже услышати молитвы моя и моление, имже раб твой молится пред тобою днесь,

²⁰еже быти очесем твоим отверстым на дом сей день и нощь, на место сие, о немже глаголал еси, да призовется имя твое тамо, еже услышати молитву, еюже раб твой молится на месте сем:

²¹и послушати мольбу раба твоего и людий твоих израиля, елика аще помолятся на месте сем и ты услышиши на месте жилища твоего с небесе, и услышиши, и милостив будеши:

²²аще согрешит муж ко искреннему своему и приимет на него клятву еже клясти его, и приидет и прокленет пред олтарем в дому сем,

²³и ты услыши от небесе и суди рабом твоим, еже воздати беззаконному, и воздати пути его на главу его, и оправдити праведнаго, воздая ему по правде его:

²⁴и аще одолени будут людие твои израиль от враг, аще согрешат тебе и обратятся, и исповедятся имени твоему, и помолятся пред тобою в храме сем,

²⁵и ты услыши с небесе и милостив буди грехом людий твоих израиля и возврати их в землю, юже дал еси им и отцем их:

²⁶егда заключиши небо, и не будет дождя, яко согрешат тебе, и помолятся на месте сем, и восхвалят имя твое, и обратятся от грех своих, егда смириши их,

²⁷и ты услыши с небесе и милостив буди грехом рабов и людий твоих израиля, яко явиши им путь благ, по немуже пойдут, и даждь дождь на землю твою, юже дал еси людем твоим в наследие:

²⁸глад аще будет на земли, губителство аще будет, воздуха растление и иктер, прузи и гусеницы аще будут, и аще оскорбит их враг пред градами их, всякою язвою и всякою болезнию,

²⁹и всяка молитва, и всяко моление, еже аще будет всякому человеку и всем людем твоим израилю, аще познает человек язву свою и грех свой и прострет руце свои в дому сем,

³⁰и ты услыши с небесе от готоваго жилища твоего, и очести, и даждь коемуждо по путем его, якоже веси по сердцу его, ты бо един веси сердца сынов человеческих,

³¹яко да боятся тебе, еже ходити бо всех путех твоих вся дни, в няже живут на лицы земли юже дал еси отцем нашым:

³²и всяк чуждии, иже несть от людий твоих израиля, и приидет от земли дальния ради имене твоего великаго и ради руки твоея сильныя и мышцы твоея высокия, и приидет и помолится на месте сем,

³³и ты услыши с небесе от готоваго жилища твоего, и сотвориши по всему, елико призовет тя чуждий, да уведят вси людие земли имя твое и убоятся тебе, якоже людие твои израиль, и познают, яко имя твое призвано есть на дом сей, егоже создах:

³⁴аще же изыдут людие твои на брань противу супостат своих по пути, имже послеши их, и помолятся тебе по пути града сего, егоже избрал еси себе, и дому, егоже создах имени твоему,

³⁵да услышиши с небесе молитву их и моление их, и сотвориши оправдание их:

³⁶зане согрешат тебе, яко несть человек, иже не согрешит, и поразиши их, и предаси их в руки врагов их, и пленят их пленяющии в землю врагов, в землю дальнюю или ближнюю,

³⁷и обратят сердце свое в земли их, в нюже пленени будут, и тамо обратятся, и помолятся тебе в пленении своем, глаголюще: согрешихом, беззаконновахом, неправдовахом,

³⁸и обратятся к тебе всем сердцем своим и всею душею своею в земли пленивших я, идеже плениша их, и помолятся путем земли своея, юже дал еси отцем их, и града, егоже избрал еси, и дому, егоже создах имени твоему:

³⁹да услышиши с небесе от готоваго жилища твоего молитву их и моление их, и сотвориши суд, и милостив буди людем твоим согрешившым ти:

⁴⁰и ныне, Господи, да будут отверсте очи твои, и уши твои внятне к молению места сего:

⁴¹и ныне востани, Господи Боже, в покой твой, ты и кивот крепости твоея: священницы твои, Господи Боже, да облекутся во спасение, и преподобнии твои возвеселятся во благих:

⁴²Господи Боже, да не отвратиши лица христа твоего, помяни щедроты давида раба твоего.