Read Елизаветинская Библия, 1751 2-я Паралипоменон 9 Bible Online

2-я Паралипоменон 9 - Елизаветинская Библия, 1751 bible

2-я Паралипоменон 9

¹Царица же савска услыша имя соломоново и прииде искусити его гаданьми во Иерусалиме с силою тяжкою зело: и велблюды носящии ароматы и злата множество и камения драгаго: и прииде к соломону и глагола ему вся, елика беша в сердцы ея.

²И возвести ей соломон вся словеса ея, и не прейде слово, егоже бы не возвестил ей.

³И виде царица савска премудрость соломоню, и дом егоже созда,

⁴И яди столов его, и седалища рабов его, и состояние служебников его и ризы их, и виночерпчия его и украшение их, и всесожжения, яже жряше в дому Господни, и вне себе бысть.

⁵Рече же ко царю: истинно есть слово, еже слышах в земли моей о словесех твоих и о премудрости твоей:

⁶и не веровах словесем их, дондеже приидох, и видеста очи мои, и се, не возвестиша мне половины множества премудрости твоея: приложил еси ко слышанию яже слышах:

⁷блажени мужие твои и блажени раби твои сии, иже предстоят пред тобою на всяко время и слышат премудрость твою:

⁸да будет Господь Бог твой благословен, иже благоволи в тебе, еже дати тя на престол свой царя Господу Богу твоему: зане возлюби Господь Бог твой израиля, еже утвердити его во век, и постави тя над ними царя, да сотвориши суд и правду.

⁹Даде же царю сто двадесять талант злата и ароматы многи зело и камение драгое, и не быша ароматы таковы яко сия, яже даде царица савска царю соломону.

¹⁰Но и раби хирамовы с рабы соломоними приношаху злато соломону драгое.

¹¹И сотвори соломон царь от древ певговых степени в дом Господень и в дом царев, и гусли и псалтири песней, и никогдаже видена быша в земли иудине прежде такоая.

¹²Царь же соломон даде царице савстей вся по желанию ея, ихже просила, кроме всех яже принесе царю соломону, и возвратися в землю свою.

¹³Бе же вес злата приносимаго к соломону на всяко лето шесть сот шестьдесят шесть талант злата,

¹⁴кроме мужей подданных и купцов, иже приношаху, и всех царей аравских и властелей земли, иже вси приношаху злато и сребро царю соломону.

¹⁵Сотвори убо царь соломон двести щитов златых тягненых, шесть сот златник чистых бяху во единем щите:

¹⁶и триста щитов златых тягненых, по триста златник бяше во единем коемждо щите, и положи я царь в дому древа ливанова.

¹⁷Сотвори же царь престол от слоновых зубов велик, и позлати его златом чистым,

¹⁸и шесть степений у престола позлащени златом, и мышчицы две туду и сюду над престолом седалища, и два льва стояща близ мышчцей,

¹⁹и дванадесять львов стоящих тамо на шести степенех от обоих стран: и не бысть таков престол во всяцем царстве.

²⁰Вси же сосуди царя соломона бяху златы, и вси сосуди дому дубравы ливанския златом окружены, сребро бо во днех соломоних ни во что вменяшеся:

²¹зане корабль царев хождаше в фарсис с рабы хирамовыми, единицею в лета три прихождаше корабль от фарсиса ко царю, полн злата и сребра и зубов слоновых и обезян.

²²И возвеличися соломон паче всех царей земных богатством и мудростию.

²³Вси же царие земстии желаху видети лице соломоне и слышати премудрость его, юже даде Бог в сердце его:

²⁴и приношаху ему кийждо дары своя, сосуды сребряны и златы, и одеяния и стакту, и сладости, кони и мски, на всякое лето.

²⁵И бяху царю соломону четыредесять тысящ кобылиц к колесницы и дванадесять тысящ конник, и постави их во градех колесничных и со царем во Иерусалиме.

²⁶И быть вождь всех царей от реки (евфрата) даже до земли иноплеменник и даже до предел египетских.

²⁷И даде царь злато и сребро во Иерусалиме яко камение, и кедры яко черничие, еже (раждается) в полях множество.

²⁸И приводяху кони соломону от египта и от всея земли.

²⁹И прочая словеса соломоня первая и последняя, се, сия писана суть в словесех нафана пророка и в словесех ахии силониты и в видениих иоиля видящаго, противу иеровоама сына наватова.

³⁰И царствова соломон во Иерусалиме над всем израилем четыредесять лет.

³¹И успе соломон со отцы своими, и погребоша его во граде давида отца его. И воцарися ровоам сын его вместо его.