Read Елизаветинская Библия, 1751 Неемия 12 Bible Online

Неемия 12 - Елизаветинская Библия, 1751 bible

Неемия 12

¹И сии суть священницы и левити, возшедшии с зоровавелем сыном салафиилевым и иисусом: сараиа, иеремиа, ездра,

²амариа, малух, аттуй,

³сехениа, реум, маримоф,

⁴адаиа, генафон, авиа,

⁵миамин, маадиа, велга,

⁶семиа, иоиарив, идиа,

⁷салуй, амук хелкиа, одуиа: сии началницы священников и братия их во дни иисуса.

⁸И левити: иисус, вануй, кадмиил, саравиа, иодай и матфаниа, при руках той, и братия их в чредныя служения:

⁹и ваквакиа и анай, братия их, прямо их во чреды дневныя.

¹⁰Иисус же роди иоакима, иоаким роди елиасива, елиасив роди иодаа,

¹¹иодай же роди ионафана, и ионафан роди адуа.

¹²Во дни же иоакима беху братия его священницы и началницы отечеств: сараии амариа, иеремии ананиа,

¹³ездре месуллам, амарии иоанан,

¹⁴амалуху ионафан, сехении иосиф,

¹⁵аресу еднас, мариофу елкей,

¹⁶аддаю захариа, ганафону месуллам,

¹⁷авии зехрий, миамину маадай, фелетию,

¹⁸валгасу самуей, семии ионафан,

¹⁹иоариву матфанай, едию озий,

²⁰салаию калаиа, амеку авед,

²¹елкии асавиа, иедии нафанаил.

²²Левити во дни елиасива, иоада и иоа, и иоанан и идуа, написани началницы отечеств, и священницы в царство дариа персскаго.

²³И сынове левии началницы отечеств писани в книзе словес дний и даже до дний иоанана сына елисуева.

²⁴И началницы левитом асавиа и саравиа и иисус, и сынове кадмииловы и братия их пред ними в песнех хвалити и исповедовати, по заповеди давида человека Божия, по чредам от дне до дне.

²⁵Матфаниа и ваквакиа, авдиа, месуллам, телмон, акув, стрегущии дверницы стражу, внегда собрати ми дверники.

²⁶Во дни иоакима сына иисусова, сына иоседекова, и во дни неемии и ездры священника и книгочии,

²⁷и во обновлении стены Иерусалимския, взыскаша левитов в местех их да возведут их во Иерусалим сотворити обновление и веселие во хвалении и песнех, в кимвалех и псалтирех и гуслех.

²⁸И собрашася сынове поющих и от страны окрестныя во Иерусалим, и от сел нетофатиевых,

²⁹и от дому (галгал) и от стран (гева и азмавет), яко села создаша себе певцы окрест Иерусалима:

³⁰и очистишася священницы и левити, и очистиша людий и врата и стену.

³¹И возведох началников иудиных на стену, и поставих два клироса велика, хвалы ради, и проидоша от десныя страны на стену ко вратом гнойным.

³²И идоша за ними осаиа и половина началников иудиных,

³³и азариа и ездра и месуллам,

³⁴иуда и вениамин, и самаиа и иеремиа:

³⁵и от сынов священничих с трубами захариа сын ионафанов, сын самаии, сын мафаниин, сын михаин, сын закхуров, сын асафов,

³⁶и братия его самаиа и озиил, гелол, маиа, нафанаил и иуда и ананий, еже хвалити в песнех давида человека Божия:

³⁷и ездра книгочий пред ними при вратех источника, хвалити прямо их. И взыдоша на лествицы града давидова, на восход стены выше дому давидова и даже до врат водных к востоку.

³⁸И клирос вторый хвалу воздающих идяше сопротив их, и аз по нем, и половина людий по стене, верху столпа фануримля и даже до стены пространнейшия,

³⁹и на врата ефраима, и на врата старая, и на врата рыбная, и на столп анамеиль, и на столп емаф, и даже до врат овчих.

⁴⁰И сташа на вратех стражи, сташа же два клироса хваляща в дому Божии, и аз и половина воевод со мною,

⁴¹и священницы елиаким, маасиа, миамин, михеа, елиона, захариа, ананиа с трубами,

⁴²и маасиа и семеиа, и елеазар и озиа, и иоанан и мелхиа, и елеамий и иезур. И слышани быша певцы и иезриа, и соглядани, и восхвалиша.

⁴³И пожроша в день той жертвы великия и возвеселишася, яко Бог возвесели их вельми: и жены их и чада их радовахуся, и слышано бысть веселие то во Иерусалиме издалеча.

⁴⁴И поставиша в день той мужей над сокровищными хранилищи, на начатки и десятины, и да собирают сими началниками от градов части священником и левитом, яко веселие бе во иудеи, во священницех и в левитех предстоящих,

⁴⁵и стрежаху стражу Бога своего, и хранение очищения, и певцев и дверников, по повелению давида и соломона сына его.

⁴⁶Яко во дни давидовы асаф от начала первый в певцех и в песнех и хвалении Богу,

⁴⁷и весь израиль во дни зоровавеля и во дни неемии даяху оброк певцем и дверником от дне до дне и освящаху левитом, левити же освящаху сыновом аароним.