Read Елизаветинская Библия, 1751 Неемия 13 Bible Online

Неемия 13 - Елизаветинская Библия, 1751 bible

Неемия 13

¹В день той чтено бысть в книзе моисеове во слышание людем, и обретеся написано в ней: да не имут внити амманитяне и моавитяне в церковь Божию даже до века,

²понеже не сретоша сынов израилевых со хлебом и водою и наяша на них валаама на проклятие их: и обрати Бог наш проклятство на благословение.

³И бысть егда слышаху закон, и отлучиша всех чуждих от израиля.

⁴И прежде сего елиасив священник живяше в сокровищнем дому Бога нашего, сродник товиин,

⁵и сотвори ему сокровищный дом велик: таможе бяху прежде приносяще жертву и ливан, и сосуды и десятину пшеницы и вина и елеа, уставленая левитом и певцем и дверником, и начатки священническия.

⁶Во всех же сих не бых во Иерусалиме, понеже в лето тридесять второе артаксеркса царя вавилонскаго приидох ко царю: и по скончании дний испросих от царя

⁷и приидох во Иерусалим, и уразумех зло, еже сотвори елиасив товии, сотворити ему сокровищный дом во дворе дому Божия,

⁸и зло явися ми зело: и извергох вся сосуды дому товиева вон из дому сокровищнаго,

⁹и рекох, и очистиша сокровищный дом: и возвратих онамо сосуды дому Божия, жертву и ливан.

¹⁰И познах, яко части левитския не быша даны, и побегоша кийждо на село свое левити и певцы творящии дело.

¹¹И пряхся со стратигами и рекох: чесо ради оставлен бысть дом Божий? И собрах их и поставих оных во стояниих своих.

¹²И весь иуда принесоша десятину пшеницы и вина и елеа в сокровища под руку селемии священника и садока писца и фадаии от левит,

¹³и при них анан сын закхуров, сын матфаниев, яко верни искушени суть над ними разделяти братиям своим.

¹⁴Помяни мя, Боже, того ради, и да не погибнет милость моя, юже сотворих в дому Господа Бога моего и в чинех его.

¹⁵Во днех тех видех во иуде топчущих точило в субботу, и носящих снопы, и возлагающих на ослы и вино, и гроздие, и смоквы, и всякое бремя, и носящих во Иерусалим во дни субботныя: и засвидетелствовах им в день продаяния их.

¹⁶И тиряне обиташа в нем приносяще рыбы, и вся продаемая продающе в субботы сыновом иудиным и во Иерусалиме.

¹⁷И обличих сынов иудиных свободных и рекох им: что сия вещь злая, юже вы творите, и скверните день субботный?

¹⁸не сия ли сотвориша отцы ваши, и наведе на них Бог наш и на нас вся злая сия, и на град сей, и вы прилагаете гнев на израиля, скверняще субботу?

¹⁹Бысть же егда поставишася врата во Иерусалиме прежде субботы, и рекох, и запроша двери и повелех, да не отверзают их даже по субботе: и от отрок моих поставих над враты, да ни един вносит бремя в день субботный.

²⁰И сташа вси и творяху куплю вне Иерусалима единощи и дващи.

²¹И засвидетелствовах о них и рекох им: что вы пребываете пред стеною? аще вторицею сие сотворите, простру руку мою на вас. И от времене того не приидоша в субботу.

²²И рекох левитом, иже бяху очищени, дабы приходили хранити врат и святити день субботный. И сих ради помяни мя, Боже, и прости ми по множеству милости твоея.

²³И во днех онех видех иудеев поемших жены азотския, амманитяны, моавитския,

²⁴и сынове их от полу глаголаху азотским языком и не умеяху глаголати иудейски:

²⁵и запретих им, и проклях их, и поразих от них мужей, и оплеших их, и заклях их Богом, аще дадите дщери вашя сыновом их и аще поймете от дщерей их сыновом вашым и себе:

²⁶не тако ли согреши соломон царь израилев? и во языцех мнозех не бысть царь подобен ему, и возлюблен Богу бе, и постави его Бог царем над всем израилем, и того прельстиша жены чуждия:

²⁷и мы послушаем ли вас творити всяко зло сие, согрешити Богу нашему, еже пояти жены иноплеменничи?

²⁸И от сынов иоада сына ельтува священника великаго, зятя санаваллатова уранитина, и изгнах его от мене.

²⁹Помяни им, Боже, за осквернение священства и завета священническа и левитска.

³⁰И очистих их от всякия чуждия нечистоты, и поставих чреды священником и левитом, комуждо по делу его,

³¹и даяние древес во временех уставленых и первородных. Помяни мя, Боже наш, во благое.