Read Елизаветинская Библия, 1751 Неемия 2 Bible Online

Неемия 2 - Елизаветинская Библия, 1751 bible

Неемия 2

¹И бысть в месяце нисане лета двадесятаго артаксеркса царя, и вино бе предо мною: и взях вино и дах царю, и не бе ин пред ним.

²И рече ми царь: чесо ради лице твое прискорбно есть, а неси болезнуяй? и несть сие, разве скорбь сердца. И убояхся зело

³и рекох царю: царю, во веки живи: како не быти прискорбну лицу моему, понеже град, дом гробов отец моих опусте, и врата его сожжена суть огнем.

⁴И рече ми царь: почто о сем ты вопрошаеши? И помолихся Господу Богу небесному

⁵и рекох ко царю: аще царю видится благо, и аще угоден будет раб твой пред тобою, да послеши мене во иудею, во град гробов отец моих, и возсозижду его.

⁶Рече же ми царь, и наложница седяше близ его: до коего времене будет путь твой, и когда возвратишися? И угодно бысть пред лицем царевым, и посла мя, и положих ему время.

⁷И рекох царю: аще царю видится благо, даждь мне послание ко воеводам стран за рекою, да преведут мене, дондеже прииду во иудею,

⁸и послание ко асафу стражу дубравы царевы, да даст ми древа покрыти врата столпа дому, и на стены градныхя, и на дом, в оньже вниду. И даде ми царь, якоже рука Божия благая (бе) со мною.

⁹И приидох ко воеводам стран за рекою и дах им послание царево: посла же царь со мною началники силы и конницы.

¹⁰И услыша санаваллат аронитин и товиа раб аммонитин, и зло има бысть, яко прииде человек взыскати блага сыновом израилевым.

¹¹И приидох во Иерусалим и бых ту три дни.

¹²И востах нощию аз и мужие не мнози со мною, и ни комуже возвестих, что Бог дает в сердце мое сотворити со израилем, и скота не бе со мною, токмо скот, на немже аз седях.

¹³И внидох во врата юдоли нощию, ко устию источника смоковничнаго и ко вратом гнойным, и бых размышляя о стене Иерусалимстей разореней и о вратах его пояденых огнем.

¹⁴И приидох ко вратом источника и ко купели цареве, и не бысть места скоту, на немже седях, да пройдет.

¹⁵И взыдох на стену потока нощию, и размышлях о стене, и бех во вратех юдоли, и возвратихся.

¹⁶Стрегущии же не ведяху, камо ходих и что аз творю, и иудеом и священником, и честным и воеводам и прочым творящым дела даже до тогда не сказах.

¹⁷И рекох им: вы видите озлобление сие, в немже есмы, како Иерусалим опустошен, и врата его предана огню: приидите, и созиждем стены Иерусалима, и не будем ктому в поношение.

¹⁸И сказах им руку Божию, яже есть блага со мною, и словеса царева, яже глагола мне, и рекох: востанем и созиждем. И укрепишася руцы их во благое.

¹⁹И услыша санаваллат аронитин и товиа раб аммонитин и гисам аравитин, и посмеяшася нам, и приидоша к нам, и уничижиша, и рекоша: что дело сие, еже вы творите? еда вы противу царя отметаетеся?

²⁰И воздах им слово и рекох к ним: Бог небесе, той благопоспешит нам, и мы раби его чистии, (востанем) и созиждем: вам же несть части и правды и памяти во Иерусалиме.