Read Елизаветинская Библия, 1751 Неемия 3 Bible Online

Неемия 3 - Елизаветинская Библия, 1751 bible

Неемия 3

¹И воста елиасув священник великий и братия его священницы, и создаша врата овчая: сии освятиша их и поставиша двери их и даже до столпа ста лакот освятиша их, даже до столпа анамеиля.

²И близ его созидаша мужие иерихонстии, и близ их созида закхур сын аманиин.

³Врата же рыбная созидаша сынове асанаевы: сии покрыша их и поставиша двери их и заворы их и вереи их.

⁴И близ их созидаше из рамофы сын уриин, сына аккосова: и близ его созидаше мосоллам сын варахиин, сына мазевиля: и близ их созидаше садок сын ваанаев:

⁵и близ их созидаша фекоими, сильнии же их не положиша выи своея в дело Господа Бога своего.

⁶И врата старая созидаше иоида сын фасеков и месуллам сын васодиев: тии покрыста их и постависта двери их и заворы и вереи их.

⁷И близ их созидаша малтиа гаваонитин и еварон миронофит, мужие от гаваона и масфы, даже до престола князя (иже бысть) об он пол реки.

⁸И близ его созида озиил сын арахиев златарь: и близ его созида ананиа сын рокеима, и возставиша Иерусалим даже до стены широкия.

⁹И близ их созидаше рафаиа сын сурин, началник половины окрестныя страны Иерусалимли.

¹⁰И близ их созидаше иедеа сын еромафов, и противу дому его: и близ его созида аттуф сын асаваниин.

¹¹И вторую часть созидаше мелхиа сын ирамов и асув сын фааф-моавль, и даже до столпа пещнаго.

¹²И близ его созидаше саллум сын аллоисов, началник половины страны окрестныя Иерусалимли, той и дщери его.

¹³Врата юдоли созидаша анун и обитающии в заноне: тии создаша их и поставиша двери их и заворы их и вереи их, и тысяща лакот в стене даже до врат гнойных.

¹⁴И врата гнойная созидаше мелхиа сын рихавль, началник окрестныя страны вифакрамския, той и сынове его, и покрыша их и поставиша двери их и заворы их и вереи их.

¹⁵И врата источника созидаше соломон сын халезеов, началник страны масфы: той созда их и покры их, и постави двери их и заворы их и вереи их, и стену купели силоамли ко вертограду цареву и даже до степеней низходящих от града давидова.

¹⁶По немже созидаше неемиа сын завухов, началник половины страны вифсуровы, даже до вертограда гроба давидова и даже до купели устроеныя и даже до дому сильных.

¹⁷По нем созидаша левити, раум сын ванаимль: по нем созидаше асавиа, началник половины страны кеилы на стране своей,

¹⁸и по нем созидаша братия их, веней сын инададов, началник половины окрестныя страны кеилы.

¹⁹И созидаше близ его азур сын иисусов, началник масфы, меру вторую столпа восхода касающагося углу.

²⁰И по нем созидаше варух, сын завуев, меру вторую от угла даже до врат дому елиасува священника великаго.

²¹По нем созидаше мерамоф сын урии, сына аккосова, меру вторую от врат дому елиасувова даже до конца дому елиасувова.

²²И по нем созидаша священницы, мужие от поля (иорданска).

²³И по нем созидаста вениамин и асув противу домов своих: и по нем созидаше азариа сын маасиев, сына ананиина, близ дому своего.

²⁴По нем созидаше ваней сын ададов меру вторую от дому азарии даже до угла и даже до уклонения.

²⁵Фалах сын узаин противу угла и столпа возвышенаго из дому царева высоко, иже во дворе темничнем: и по нем фадаиа сын форосов.

²⁶И нафиними обиташа во офале, даже до вертограда врат водных ко востоком и даже до столпа, иже бе возвышен.

²⁷И по них созидаша фекоими меру вторую от страны столпа великаго и высокаго даже до стены офлы.

²⁸Вышше врат конских созидаша священницы, един кийждо противу дому своего.

²⁹И по нем созидаше саддук сын еммирь противу дому своего: и по нем созидаше самаиа сын сехениев, страж врат восточных.

³⁰По нем созидаше ананиа сын селемиев и аном сын селефов шестый меру вторую: по нем созидаше месуллам сын варахиев противу сокровищницы своея.

³¹По нем созидаше мелхиа сын сарефиев даже до дому нафинимля и щиты продающих, противу врат судных, и даже до горницы угла.

³²И посреде врат овчих созидаша ковачи и щитопродавцы.