Read Елизаветинская Библия, 1751 2 Ездра 2 Bible Online

2 Ездра 2 - Елизаветинская Библия, 1751 bible

2 Ездра 2

¹Царствующу киру персскому перваго лета, во исполнение слова Господня усты иеремииными,

²воздвиже Господь дух кира царя персскаго, и проповеда во всем царстве своем, и купно писаньми, глаголя:

³сия глаголет кир царь персский: (Господь) мене постави царя вселенней, Господь израилев, Господь вышний,

⁴и назнамена мне создати ему дом во Иерусалиме, иже во иудеи:

⁵аще убо кто есть в вас от языка его, да будет Господь его с ним: и возшед во Иерусалим, иже во иудеи, да созиждет дом Господа израилева: сей Господь, иже вселися во Иерусалиме:

⁶елицы убо окрест мест обитают, да помогут ему, иже суть на месте том, и златом и сребром,

⁷даянием с конми и скоты и иными по обещанию предлагаемыми во святилище Господне, еже во Иерусалиме.

⁸И стоящии началницы коленом отечеств иудиных и колена вениаминова, и священницы и левити, и вси, ихже дух воздвиже Господь взыти, создати дом Господень, иже во Иерусалиме,

⁹и иже окрест их, помогоша во всем златом и сребром, конми и скоты и обетами многими зело, ихже чувство воздвижено бысть.

¹⁰И кир царь изнесе священныя сосуды Господни, ихже пренесе навуходоносор (царь вавилонский) из Иерусалима и постави их во идолнице своей:

¹¹и изнесе тыя кир царь персский и предаде я мифридату сокровищехранителю своему,

¹²той же предаде сасавассару властителю иудейскому.

¹³Ихже сие число бе: возливалниц златых тысяща, и возливалниц сребряных тысяща, кадилниц сребряных двадесять девять, фиал златых тридесять, сребряных две тысящы четыре ста и десять, и иных сосудов тысяща:

¹⁴всех же сосудов пренесеных златых и сребряных пять тысящ четыре ста шестьдесят девять.

¹⁵Принесени же сасавассаром вкупе с теми, иже от пленения из вавилона во Иерусалим.

¹⁶Во временех же артаксеркса царя персскаго, восписаша ему на обитающих во иудеи и Иерусалиме вилемос и мифридат, и тавеллий и рафим, и веелтефм и самеллий писец, и прочии соучиненнии, обитающии в самарии и во иных местех, нижеписанное послание:

¹⁷царю артаксерксу господину отроцы твои, рафим писец случаев и самеллий писец, и прочии от совета их и судии, иже в килисирии и финикии:

¹⁸и ныне знаемо да будет господину царю, яко иудее, иже взыдоша от вас, к нам пришедшии во Иерусалим град отметный и строптивый, созидают торжища его, и составляют стены его, и храм воздвизают:

¹⁹аще убо град той созиждется и стены совершены будут, не токмо дани не потерпят даяти, но и царем воспротивятся:

²⁰а понеже действуются яже о храме, право быти разсуждаем не презрети сего,

²¹но знаемо сотворити господину нашему царю, да аще возмнится тебе, да взыщется в книгах отец твоих,

²²и обрящеши в летописцех писано о тех, и познаеши, яко град той бяше отметник и царей и грады смущающь,

²³и иудее отступницы, и ополчение сотворяюще в нем от века, еяже ради вины и град той опустошен бысть:

²⁴ныне убо знаемо ти творим, господине царю яко аще град сей создан будет и стены его возставлены будут, исходу тебе ктому не будет в килисирию и финикию.

²⁵Тогда восписа царь рафиму пишущему случаемая и веелтефму и самеллию писцу и прочым, соучиненым и обитающым в самарии и сирии и финикии, сия писаная:

²⁶чтох послание, еже посласте ко мне: повелех убо взыскати, и обретено есть, яко град той есть от начала царем противляющься,

²⁷и человецы отступления и ополчение в нем сотворяюще, и царие крепцы и жестоцы быша во Иерусалиме, обладающе и дани налагающе на килисирию и финикию:

²⁸ныне убо повелех возбранити человеком оным созидати град и предусмотряти, да ничтоже боле сих сотворят,

²⁹ни да происходят бо множайшая лукавства, во еже царем труд творити.

³⁰Тогда прочетше от царя артаксеркса написанная рафим и самеллий писец и с ними соучиненнии, впрягше потщанно приидоша во Иерусалим с конники и народным ополчением,

³¹и начаша созидающих удержавати: и упразднися созидание храма, иже во Иерусалиме, даже до втораго лета царства дариа царя персскаго.