Read Елизаветинская Библия, 1751 2 Ездра 3 Bible Online

2 Ездра 3 - Елизаветинская Библия, 1751 bible

2 Ездра 3

¹И воцарився дарий сотвори вечерю велику всем, иже под ним, и всем, иже от дому рода его, и всем вельможам мидским и персским,

²и всем сатрапом, и наместником, и воеводам, иже под ним от индии даже до ефиопии на сто двадесять седмь воеводств.

³И егда ядоша и пиша, и насытившеся возвратишася, тогда дарий царь вниде в ложницу свою, и поспа и возбудися.

⁴Тогда трие юноши телеснии стражы, иже стрежаху тело царево, рекоша друг ко другу:

⁵рцем кийждо от нас едино слово: и иже превозможет, и егоже явится слово мудрейше другаго, даст ему царь дарий дары великия и почести великия,

⁶и порфирою одеян будет, и во злате пити и на злате спати, и колесницу златоуздну, и кидар виссонный, и гривну окрест выи,

⁷и вторый сядет по дарии ради премудрости своея, и сродник дариев наречется.

⁸И тогда написавше кийждо свое слово запечаташа и подложиша под возглавие дариа царя,

⁹и рекоша: егда востанет царь, дадут ему писание, и егоже разсудит царь и три вельможи персстии, яко слово его мудрейше есть, тому да дастся победа, якоже писано есть,

¹⁰Един написа: сильнее есть вино,

¹¹Другий написа: сильнее есть царь.

¹²Третий написа: сильнее суть жены, паче же всех побеждает истина.

¹³Егда же воста царь, вземше писания даша ему, и прочте.

¹⁴И послав созва всех вельможей персских и мидских и сатрапов, и воевод и наместников и ипатов,

¹⁵и седе в советней палате, и прочтено бысть писание пред ними.

¹⁶И рече: призовите юнош, и тии известят словеса своя. И призвани быша и внидоша.

¹⁷И рече им: возвестите нам о тех, яже писана суть. И нача первый, иже глагола о крепости вина,

¹⁸и рече сице: о, мужие, коль премогает вино! всех человек пиющих его прельщает:

¹⁹ум царев и сираго творит ум един, и раба и свободнаго, и убогаго и богатаго,

²⁰и всяк ум превращает в безстрашие и веселие, и не памятует всякия печали и всякаго долга:

²¹и вся сердца сотворяет богата, и не памятует царя, ниже вельможи, и вся по талантом глаголати творит:

²²и не памятуют, егда пиют, угождати другом и братии, и не много потом извлачат мечы:

²³и егда от вина востанут, не помнят, яже сотвориша:

²⁴о, мужие не премогает ли вино, еже тако понуждает творити? И умолча глаголавый сице.