Read Елизаветинская Библия, 1751 2 Ездра 4 Bible Online

2 Ездра 4 - Елизаветинская Библия, 1751 bible

2 Ездра 4

¹И нача вторый глаголати, рекий о крепости царстей:

²о, мужие! не премогают ли человецы, землю и море обдержаще, и вся, яже в них?

³царь же премогает и господствует всеми и владычествует ими, и все, еже речет им, творят:

⁴аще речет им творити брань ко друг другу, творят: и аще послет их на супостаты, идут и истрывают горы и стены и столпы,

⁵убивают и убиваеми бывают, и царева словесе не преступают: аще же победят, царю приносят вся, и елика аще пленят, и ина вся:

⁶и елицы не воюют, ниже ополчаются, но делают землю, паки, егда сеют, зажинающе приносят цареви,

⁷и един другаго понуждающе, приносят дань царю:

⁸и той сам един есть: аще речет убити, убивают: аще речет отпустити, отпускают: речет поразити, поразят:

⁹речет разорити разорят: речет созидати, созидают: речет, посецыте, посецают: речет насадити, насаждают:

¹⁰и вси людие его и силы его слушают единаго: и к сим той возлежит, яст и пиет и спит:

¹¹тии же стрегут окрест его и не могут отити, кийждо творити дел своих, ниже преслушают его:

¹²о, мужие! како не превозмогает царь, егоже тако слушают? И умолча.

¹³Третий же, иже рече о женах и о истине, той есть зоровавель, нача глаголати:

¹⁴о, мужие! не велик ли есть царь и мнози человецы, и вино не премогает ли? кто же есть властвуяй ими или кто господствуяй ими? не жены ли?

¹⁵жены родиша царей и всех людий, иже господствуют над морем и землею:

¹⁶и от тех рождени суть, и тыя воздоиша тех, иже насадиша винограды, от которых вино творится:

¹⁷и тыя творят ризы (красны) человеком, и тыя творят славу человеком, и не могут человецы быти без жен:

¹⁸и аще соберут злато и сребро и всяку вещь красну, и увидят жену едину добру зраком и красотою,

¹⁹и вся сия оставльше, на ню внемлют, и отверстыми усты зрят ю, и вси оныя желают паче злата и сребра и всякия вещи предрагия:

²⁰человек отца своего оставляет, иже воспита его и свою страну, и ко своей жене прилепляется,

²¹и с женою оставляет душу, и ниже отца памятует, ни матере, ниже страны:

²²и отсюду подобает вам разумети яко жены властвуют вами: не болезнуете ли, и труждаетеся, и вся женам даете и приносите?

²³и вземлет человек оружие свое, и исходит на путь творити разбой, (убийства,) и татьбу и на море плавати и на реки,

²⁴и льва видит, и во мрак входит: и егда украдет и похитит и корысть обрящет, ко возлюбленней своей приносит:

²⁵и паче любит человек жену свою, нежели отца и матерь:

²⁶и мнози обезумишася от лиц женских и раби быша ради тех,

²⁷и мнози погибоша и прельстишася и согрешиша ради жен:

²⁸и ныне не веруете ли мне? не велик ли есть царь во власти своей? не вся ли страны не смеют прикоснутися ему?

²⁹видех его и апаминю, дщерь вартака дивнаго, наложницу цареву, седящую одесную царя

³⁰и отемлющую диадиму со главы царевы и возлагающу на себе, и по ланите бияше царя левою рукою:

³¹и кроме сих царь отверстыми усты зряше на ню: и аще посмеется пред ним, смеется и он: аще же разгневана будет нань, ласкает ю, дондеже примирится ему:

³²о, мужие, не сильны ли жены, яко сице творят?

³³И тогда царь и вельможи смотряху друг на друга. И нача глаголати о истине:

³⁴о, мужие, не сильны ли жены? велика земля, и высоко небо, и быстро течением солнце, яко обращается на крузе небеснем и паки притекает на место свое во един день:

³⁵не велик ли, иже сия творит? и истина велика и крепчае паче всех:

³⁶вся земля истину призывает, и небо оную благословляет, и вся дела трясутся и трепещут (ея), и несть с нею обиды ни единыя:

³⁷обидит вино, обидит царь, обидит жены, неправедни вси сынове человечестии, и неправедна вся дела их сицевая, и несть в них истины, и во своей неправости погибают:

³⁸истина же пребывает и возмогает во век, и живет и обладает во век века,

³⁹и несть у нея приятия лица, ниже различия, но правая творит и от всех неправедных и лукавых огребается, и вси благоволят в делех ея,

⁴⁰и несть в суде ея ничтоже неправедно: и сия крепость и царство, и власть и величество всех веков: благословен Бог истины.

⁴¹И преста глаголати. И вси людие тогда возопиша и рекоша: велика есть истина и премогает.

⁴²Тогда царь рече ему: проси еже хощеши, множае писаных, и дам тебе, понеже обретен еси мудрейший, и близ мене да сядеши, и сродник мой наречешися.

⁴³Тогда рече царю: помяни обещание твое, имже обещал еси создати Иерусалим в день, в оньже царство твое приял еси,

⁴⁴и вся сосуды взятыя из Иерусалима отпустити, ихже отлучи кир, егда заклятся изсещи вавилон, и обеща послати тамо:

⁴⁵ты же обещал еси создати храм, егоже сожгоша идумее, егда опустошена бысть иудеа от халдеи:

⁴⁶и ныне сие есть, еже прошу от тебе, господи царю и о том молю тя, и сие есть величество, еже от тебе: молю убо, да сотвориши обещание, еже обещал еси царю небесному сотворити из уст твоих.

⁴⁷Тогда востав царь дарий, облобыза его и написа о нем послание ко всем правителем и воеводам, и наместником и вельможам, да проводят его и всех сущих с ним восходящих созидати Иерусалим:

⁴⁸и всем наместником, иже бяху в килисирии и финикии и иже в ливане, написа послание, да привозят древа кедрова от ливана во Иерусалим и да созидают с ним град:

⁴⁹писа же и всем иудеом восходящым от царства во иудею о свободе, да всяк сильный и вельможа, и наместник и правитель не приходит ко вратом их,

⁵⁰и всю страну, юже обдержат, безданну быти им: и идумее да оставят села иудейская, имиже обладают:

⁵¹и на созидание храма даяти по всякое лето талант двадесять, дондеже созиждется:

⁵²и на жертвенник всесожжения приносити на всяк день, якоже имеют заповедь, иных талант седмьнадесять, да приносят десять на коеждо лето:

⁵³и всем приходящым от вавилона созидати град, да будет свобода им и сыном их, и всем священником приходящым.

⁵⁴Написа же и подаяние, и священническую ризу (повеле дати), в нейже служат.

⁵⁵И левитом писа даяти оброк даже до дне, в оньже совершится дом и Иерусалим созиждется.

⁵⁶И всем стрегущым града писа, даяти им жребии и оброки.

⁵⁷И отпусти вся сосуды, яже отлучи кир от вавилона, и вся елика рече кир сотворити, и он повеле творити и послати во Иерусалим.

⁵⁸И егда изыде юноша (сей), воздвиг лице на небо прямо Иерусалиму, благослови Царя небеснаго, глаголя:

⁵⁹от тебе победа и от тебе премудрость, и твоя слава, и аз раб твой:

⁶⁰благословен еси, иже дал еси мне премудрость, и тебе исповемся, Господи Боже отец наших.

⁶¹И прия послания, и изыде, и прииде в вавилон, и возвести братии своей всем.

⁶²И благословиша Бога отец своих, яко даде им ослабу и отпущение,

⁶³да взыдут и созиждут Иерусалим и храм, идеже именовано есть имя его в нем. И радовахуся с мусикиею и веселием дний седмь.