Read Елизаветинская Библия, 1751 2 Ездра 5 Bible Online

2 Ездра 5 - Елизаветинская Библия, 1751 bible

2 Ездра 5

¹По сих же избрани суть изыти началницы домов отечеств по племеном их, и жены их, и сынове их, и дщери их, и раби их, и рабыни их, и скоти их:

²и дарий царь посла с ними конники тысящу, дондеже возведут их во Иерусалим с миром и с мусикиею, с тимпаны и трубами:

³и вся братия их бяху играюще, и сотвори их взыти вкупе с ними.

⁴И сия суть имена мужей, иже взыдоша по отечеством своим и по коленом в части началств своих:

⁵священницы сынове финееса, сына аароня, иисус сын иоседека сареова и иоаким сын зоровавеля сына салафиилева, от дому давидова, от рода фаресова, колена же иудина,

⁶иже глаголаше при дарии цари персстем словеса премудра, во второе лето царства его, месяца нисана, перваго месяца.

⁷Суть же сии от иудеи изшедшии от плена преселения, ихже пресели навуходоносор царь вавилонский в вавилон,

⁸и возвратишася во Иерусалим и во прочую иудею, кийждо во свой град, иже приидоша с зоровавелем и иисусом, неемиею, захариею, рисеем, енинием, мардохеем, веелсаром, со асфарасом, с реелием, с роимом с вааном, началники их.

⁹Число сущих от языка и началницы их: сынове форосовы две тысящы и сто седмьдесят два, сынове сафатовы четыреста седмьдесят два,

¹⁰сынове аресовы седмь сот пятьдесят шесть,

¹¹сынове фааф-моавли две тысящы осмь сот и дванадесять,

¹²сынове иламовы тысяща двести пятьдесят четыре, сынове зафуины девять сот четыредесять пять, сынове корвеовы седмь сот пять, сынове ваниины шесть сот четыредесять осмь,

¹³сынове виваины шесть сот двадесять три, сынове садасовы три тысящы двести двадесять два,

¹⁴сынове адоникамовы шесть сот шестьдесят седмь, сынове вагоины две тысящы шестьдесят шесть, сынове адинуевы четыре ста пятьдесят четыре,

¹⁵сынове атирезекиевы девятьдесят два, сынове килановы и азитасовы шестьдесят седмь, сынове азурановы четыре ста тридесять два,

¹⁶сынове ананиевы сто един, сынове аромовы тридесять два, сынове вассаевы триста дванадесять три, сынове арсифурифовы сто два,

¹⁷сынове метировы три тысящи пять, сынове от вефломонов сто двадесять три,

¹⁸иже от нетофаи пятьдесят пять, иже от анафофа сто пятьдесят осмь, иже от вефсамоса четыредесять два,

¹⁹иже от кариафиарима двадесять пять, иже из кафиры и вирофа седмь сот четыредесять три, иже из пиры седмь сот,

²⁰иже хадиасовы и амидиевы четыре ста двадесять два, иже от кирама и гаввиса шесть сот двадесять един,

²¹иже от макалона сто двадесять два, иже от витолиа пятьдесят два, сынове нифисовы сто пятьдесят шесть,

²²сынове каламолалуевы и онусовы седмь сот дванадесять пять, сынове иереховы триста четыредесять пять,

²³сынове анаасовы три тысящы триста тридесять.

²⁴Жерцы: сынове иеддуа, сына иисуева, с сыны санасивовыми девять сот седмьдесят два, сынове от мируфа тысяща пятьдесят два,

²⁵сынове фасарони тысяща четыредесять седмь, сынове хармиевы тысяща седмьнадесять.

²⁶Левити же: сынове иесуевы и кадмииловы, и ваннуевы и судиевы, седмьдесят четыре.

²⁷Священнопевцы: сынове асафовы сто четыредесять осмь.

²⁸Дверницы же: сынове салумовы, сынове аттаровы, сынове толмановы, сынове дакувиевы, сынове титаевы, сынове самиевы, всех сто тридесять девять.

²⁹Священнослужителие: сынове исавовы, сынове асифаевы, сынове таваофовы, сынове кирасовы, сынове судовы, сынове фалеевы, сынове лаванаевы, сынове аграваевы,

³⁰сынове акуаевы, сынове утаевы, сынове китавовы, сынове агаваевы, сынове сиваиевы, сынове анани, сынове кафуаевы, сынове геддуровы,

³²сынове меедаевы, сынове куфаевы, сынове хареевы, сынове харкусовы, сынове асирари, сынове фомиевы, сынове насифовы, сынове атифаевы.

³³сынове отрок соломоновых: сынове асапфионовы, сынове фарираевы, сынове иеилевы, сынове лозони, сынове издаилевы, сынове сафифовы,

³⁴сынове агиаевы, сынове фахарефовы, сынове савиины, сынове сарофиевы, сынове масиасовы, сынове гаровы, сынове аддусовы, сынове сувасовы, сынове афераевы, сынове варадисовы, сынове сафатовы, сынове алломовы.

³⁵Всех священнослужителей и сынов отрок соломоновых триста седмьдесят два.

³⁶Сии возшедшии от фермелефа и фелерсаса, вождь их хараафаларь и ааларь,

³⁷и не могоша возвестити отечеств своих и родов, яко от израиля ли суть: сынове ладана сына ванова, сынове некодановы, шесть сот пятьдесят два:

³⁸и от жерцев творящии жречество, и не обретошася: сынове авдиины, сынове аккосовы, сынове аддуса, поемшаго авгию жену от дщерей верзеллеевых, и прозван бысть во имя его:

³⁹и сих взыскану бывшу родословному писанию и не обретену, отлучени суть от священства.

⁴⁰И рече им неемиа и атфариа, да не причащаются святынь, дондеже востанет архиерей облечен во изявление и истину.

⁴¹Вси же бяху от израиля, от двунадесяти лет и выше, кроме рабов и рабынь, четыредесять две тысящы триста шестьдесят: раби сих и рабыни седмь тысящ триста четыредесять седмь, певцы и певицы двести четыредесять пять:

⁴²верблюд четыре ста тридесять пять, коней седмь тысящ тридесять шесть, мсков двести четыредесять пять, подяремник пять тысящ пять сот двадесять пять.

⁴³И от настоятелей по отечеством, егда приидоша во храм Божий, иже во Иерусалиме, обещаша воздвигнути храм на месте его по силе своей

⁴⁴и даяти во святое сокровище на дела злата мнас тысящу и сребра мнас пять тысящ и риз священнических сто.

⁴⁵И вселишася священницы и левити, и иже (изыдоша) от народа во Иерусалим и во страну, и священнопевцы, и дверницы, и весь израиль в селех своих.

⁴⁶Настоящу же седмому месяцу и сущым сыном израилевым коемуждо во своих, собрашася единодушно во двор первых врат восточных.

⁴⁷И востав иисус сын иоседеков и братия его священницы и зоровавель сын салафиилев и братия его, уготоваша олтарь Богу израилеву,

⁴⁸да возносят на нем всесожжения по чину, якоже в книзе моисеа человека Божия писана суть,

⁴⁹И собрашася к ним от иных народов земли, и воздвигнуша жертвенник на месте своем, яко во вражде бяху с ними, и премогоша их вси языцы земстии: и приношаху жертвы по времени и всесожжения Господеви, утреннее и вечернее.

⁵⁰И сотвориша кущей потчения праздник, якоже повелено в законе, и жертвы на всяк день, якоже подобаше,

⁵¹и по сих приношения непрестанная, и жертвы субботния и новомесячныя и праздников всех освященных.

⁵²И елицы обещаша обет Богу от новомесячия седмаго месяца, начаша приносити жертвы Богу, храм же Господень не бысть еще создан.

⁵³И даша сребро каменосечцем и делателем пищу и питие с радостию, и даша карры сидоняном и тиряном, да привозят им от ливана древа кедрова, да приведут судна во иоппийское пристанище, по повелению, еже писано бысть им от кира царя персскаго.

⁵⁴И во второе лето пришед во храм Божии во Иерусалим, месяца втораго, нача зоровавель сын салафиилев и иисус сын иоседеков и братия их, и священницы, левити и вси, иже приидоша от пленения во Иерусалим,

⁵⁵и основаша храм Божий в новомесячии втораго месяца втораго лета, егда приидоша во иудею и во Иерусалим,

⁵⁶и поставиша левиты от двадесяти лет на дела Господня: и ста иисус и сынове его и братия и кадмиил брат, и сынове мадиавуни, и сынове иодаа илиадуева с сынми и братиями, вси левити единодушно дела призирателие, творяще дела в дому Господни, и создаша делателие дом Господень.

⁵⁷И сташа священницы облечени в ризы с мусикиею и трубами, и левити сынове асафовы имеюще кимвалы, восхваляюще Господа и благословяще, по давиду царю израилеву,

⁵⁸и пояху песньми благословяще Господа, яко благость его и слава во веки во всем израили.

⁵⁹И вси людие вострубиша и возгласиша гласом великим, восхваляюще Господа о воздвижении дому Господня.

⁶⁰И приидоша от священников, левитов и предстоятелей по отечеством своим старейшины, иже видеша прежний дом, к сему созиданию с плачем и воплем великим,

⁶¹и мнози со трубами и радостию гласа велия,

⁶²яко людем не слышати труб плача ради людскаго, народ бо бысть трубящь зело, яко далече слышатися.

⁶³И услышавше врази колена иудина и вениаминова, приидоша познати, кий глас трубный?

⁶⁴И познаша, яко сущии от пленения созидают храм Господу Богу израилеву.

⁶⁵И приступльше к зоровавелю и иисусу и к началником отечеств, рекоша им: да созидаем вкупе с вами:

⁶⁶тако бо, якоже вы, слушаем Господа вашего и ему жрем от дний асвасарефа царя ассирийскаго, иже пресели нас зде.

⁶⁷И рече им зоровавель и иисус и началницы отечеств израилевых: несть вам и нам созидати дом Господу Богу нашему:

⁶⁸мы бо сами созиждем Господу Богу израилеву по чину, якоже повеле нам кир царь персский.

⁶⁹Языцы же земстии стужающе сущым во иудеи и пакости творяще, не попущаху созидати,

⁷⁰и козни и людий наводяще и крамолы творяще возбраниша совершити дело созидания во все время жизни кира царя, и препятие сотвориша созиданию лета два, даже до дариева царства.