Read Елизаветинская Библия, 1751 2 Ездра 8 Bible Online

2 Ездра 8 - Елизаветинская Библия, 1751 bible

2 Ездра 8

¹И по сих, царствующу артаксерксу царю персскому, приступи ездра сын сариин, езериев, хелкиев, салумов,

²садуков, ахитов, амариев, езиев, мемерофов, зареев сауиев, воккаев, ависумов, финеесов, елеазаров, аарона перваго священника:

³той ездра взыде от вавилона, яко книгочий благоразумен сый в законе моисеове, даннем от Господа Бога израилева,

⁴и даде ему царь славу, обретшему благодать пред ним, над всеми достоинствы его.

⁵И взыдоша вкупе с ним от сынов израилевых, и священников и левитов, и священнопевцев и вратарей и рабов церковных во Иерусалим,

⁶лета седмаго царствующу артаксерксу в пятый месяц: то лето седмое царю: изшедше бо из вавилона в новомесячии перваго месяца, приидоша во Иерусалим по данному им поспеху в путь от Господа:

⁷ибо ездра многое сведение обдержаше, дабы ничто оставити сущих от закона Господня и от заповеди, еже научити всего израиля всем оправданием и судбам.

⁸Прииде же написанное повеление от артаксеркса царя ко ездре священнику и чтецу закона Господня, егоже есть списание подлежащее:

⁹царь артаксеркс ездре священнику и чтецу закона Господня радоватися:

¹⁰человеколюбно аз судив, повелех хотящым от языка иудейскаго с волею благою, и от священник и левит, и иже суть в царствии нашем, ити с тобою во Иерусалим:

¹¹елицы убо вожделеют, да соберутся и пойдут с тобою, якоже угодно мне и седми другом моим советником:

¹²да увидят деемая во иудеи и Иерусалиме, якоже есть в законе Господни,

¹³и да вносят дары Господу израилеву, ихже обещах аз и друзи во Иерусалим, и все злато и сребро, еже обретено будет во стране вавилонстей, Господу во Иерусалим, с дарованным от языка во святилище Господа Бога их, еже во Иерусалим:

¹⁴да соберется злато и сребро на юнцы и овны и агнцы, и яже тем последуют,

¹⁵да приносят жертвы Господу на олтарь Господа Бога их, иже во Иерусалиме:

¹⁶и вся елика хощеши с братиею твоею сотворити златом и сребром, соверши по воли Бога твоего,

¹⁷и священныя сосуды Господни, иже даны суть тебе, к делу дому Господа Бога твоего, иже во Иерусалиме, да положиши пред Господем Богом твоим, иже во Иерусалиме:

¹⁸и прочая, елика аще тебе потребна будут к делом храму Бога твоего, да даси от царскаго сокровища:

¹⁹и аз царь артаксеркс повелех стражем сокровища сирийскаго и финикийскаго, да, елико напишет ездра священник и чтец закона Господа Бога вышняго, прилежно дают ему, даже до сребра талант ста,

²⁰такожде и до пшеницы спудов ста и вина до мер ста:

²¹и ина премнога вся по закону Божию да совершатся с поспешением Богу вышнему, да не востанет гнев на царство царево и сынов его:

²²вам же глаголю, да всем священником и левитом, и священнопевцем и вратником, и рабом церковным и писцем церкве тоя, ни едина дань, ниже ина тягота будет, и ни едину власть имети налагати что на них:

²³ты же, ездро, по премудрости Божией, постави судии и началники, да судят во всей сирии и финикии всех ведущих закон Бога твоего, а неведущих учи:

²⁴и вси елицы преступят закон Бога твоего и царский тщателно да накажутся, или смертию, или казнию, или сребра лишением, или изгнанием.

²⁵И рече ездра книгочий: благословен един Господь Бог отец моих, иже даде сия в сердце царево прославити дом его, иже во Иерусалиме,

²⁶и мене почте пред царем и советниками и всеми други и вельможи его:

²⁷и аз благодерзостен бых по помощи Господа Бога моего, и собрах от израиля мужы, да вкупе взыдут со мною.

²⁸И сии предводителие по своим отечеством и началством, иже изыдоша со мною из вавилона в царство артаксеркса царя:

²⁹От сынов финеесовых гирсон, от сынов ифамаровых гамалиил, от сынов давидовых латтус, сын сехениев,

³⁰от сынов форосовых захариа и с ним описанных мужей сто пятьдесят,

³¹от сынов фааф-моавлих елиаониа зареов и с ним мужей двести,

³²от сынов зафоевых сехениа езеилев и с ним мужей триста, от сынов адиних овиф ионафуев и с ним мужей двести пятьдесят,

³³от сынов иламовых иесиа гофолиев и с ним мужей седмьдесят,

³⁴от сынов сафатиевых зараиа михаилов и с ним мужей седмьдесят,

³⁵от сынов иоавлих авадиа иезилов и с ним мужей двести дванадесять,

³⁶от сынов ваниевых ассалимоф сын иосафиев и с ним мужей сто шестьдесят,

³⁷от сынов вавиевых захариа виваиев и с ним мужей двадесять осмь,

³⁸от сынов астафовых иоанн акатань и с ним мужей сто десять,

³⁹от сынов адоникамовых последнии, и сия суть имена их: елифала сын иеуилев и самеа и с нима мужей седмьдесят,

⁴⁰от сынов вагоевых уфий истакуров и с ним мужей седмьдесят.

⁴¹И собрах их к реце яже нарицается феран, и ополчихомся три дни зде, и пресмотрих их.

⁴²И от сынов священничих и от левитских не обрет тамо,

⁴³послах ко елеазару и идуилу, и маазману и алнафану, и мамею и самею и иориву, нафану, еннатану, захарии и месулламу, предводителем и ученым,

⁴⁴и рекох им, да приидут к доддею вожду, иже на месте сокровищехранилницы,

⁴⁵заповедав им рещи доддею и братии его и сущым на месте сокровищехранителем, да послют к нам священствовати имущих в дому (Господа) Бога нашего.

⁴⁶И приведоша к нам державною рукою Господа Бога нашего мужы учены от сынов моолиа сына левиина, сына израилева, асевевию и сынов его и братию осмьнадесять,

⁴⁷и асевию и аннуа и осеа брата от сынов ханунеевых, и сынов их мужей двадесять:

⁴⁸и от церковных служителей, ихже даде давид и началницы к деланию левитом, церковных служителей двести двадесять: всех же имена знаменованна суть в писании.

⁴⁹И обещах ту пост юношам пред Господем Богом нашим,

⁵⁰да взыщем от него благ путь нам и сущым с нами чадом нашым и скотом.

⁵¹Усрамихбося просити от царя пеших и конников и проводников ради охранения нам от супостат,

⁵²рекохом бо царю, яко сила Господа нашего будет со ищущими его на всякое управление.

⁵³И паки помолихомся Господу Богу нашему о сих и милостива получихом.

⁵⁴И отлучих от племеноначалников и священников мужей дванадесять есеврию и ассамию и с ними от братии их мужей десять,

⁵⁵и извесих им сребро, злато и сосуды священныя дому Бога нашего, яже дарова царь и советницы его и вельможи и весь израиль:

⁵⁶и извесив предах им сребра талант шесть сот пятьдесят, и сосуд сребряных талант сто, и злата талант сто, и сосудов позлащенных двадесять, и сосудов медяных от избранныя меди блещащихся златовидных, сосудов дванадесять,

⁵⁷и рекох им: и вы святи есте Господу, и сосуди святи, и злато и сребро обещанное Господу Богу отец наших:

⁵⁸бдите и храните, дондеже воздадите вы вся племеноначалником священников и левитов и началником отечеств израилевых во Иерусалиме в сосудохранителнице дому Бога нашего.

⁵⁹И приемше священницы и левити сребро и злато и сосуды во Иерусалим, внесоша во храм Господень.

⁶⁰И воздвигшеся от реки феры в дванадесятый день перваго месяца, внидохом во Иерусалим с крепкою рукою Господа нашего, яже с нами: и избави нас Господь от исхода пути от всех враг, и приидохом во Иерусалим.

⁶¹И егда бысть тамо третий день, в четвертый день измереное злато и сребро предано в дом Господа Бога нашего мармофе сыну уриину священнику,

⁶²и с ним (бе) елеазар сын финеесов, и быста с нима иосавад сын иисусов и моиф саванниев сын, левитяне: вся по числу и весу, и написан бысть весь вес их в той час.

⁶³Пришедшии же от пленения принесоша жертвы Богу израилеву юнец дванадесять за весь израиль, овен девятьдесят шесть, агнец седмьдесят два, козлов за спасение дванадесять вся в жертву Господню.

⁶⁴И отдаша повеления царева царевым строителем и епархом килисирии и финикии, и почтоша язык и храм Господень.

⁶⁵И совершившымся сим, приступиша ко мне предводителие, глаголюще:

⁶⁶не отлучися род израилев и началницы, и священницы и левити от иноплеменных языков земли и от нечистот их, от язык хананеов и хеттеов, и ферезеов и иевусеов, и моавитов и египтян и идумеов:

⁶⁷сопрягошася бо со дщерьми их, и тии и сынове их, и смесися семя святое со иноплеменными языки земскими, и причастницы быша предводителие и вельможи беззакония сего от начала вещи.

⁶⁸И абие, егда услышах сия, раздрах одеяния и священную ризу, и терзах власы главы и брады, и седех скорбен и печален,

⁶⁹И собрашася ко мне, елицы тогда подвизахуся во слове Господа Бога израилева, мне плачущу о беззаконии, и седех скорбен даже до вечерния жертвы:

⁷⁰и востах от поста, раздрана имеющь одеяния и священную ризу, преклонив колена и простер руце ко Господу, рекох:

⁷¹Господи, постыдехся и усрамихся пред лицем твоим,

⁷²греси бо наши умножишася выше глав наших, и безумия наша воздвигошася даже до небесе,

⁷³еще от времен отец наших, и есмы в велице гресе даже до дне сего:

⁷⁴и ради грех наших и отец наших предани есмы со братиями нашими и с царьми нашими и со священники нашими царем земным в мечь и пленение и в грабление со стыдением даже до днешняго дне:

⁷⁵и ныне колико бысть нам милосердие от тебе, Господи Боже, еже оставити нам корень и имя на месте святыни твоея

⁷⁶и еже открыти светилник нам в дому Господа Бога нашего, дати нам пищу во время работы нашея: и егда служихом, не быхом оставлени от Господа Бога нашего,

⁷⁷но постави нас во благодати пред цари персскими дати нам пищу,

⁷⁸и прославити храм Господа нашего, и воздвигнути опустошенный сион, дати нам твердыню во иудеи и Иерусалиме:

⁷⁹и ныне что речем, Господи, имеюще сия? преступихом бо повеления твоя, яже дал еси рукою отроков твоих пророков, глаголя:

⁸⁰яко земля, в нюже ходите наследити, земля осквернена есть скверною иноплеменных земли, и нечистотою своею наполниша ю,

⁸¹и ныне дщерей ваших не сопрязите сыном их, и дщерей их не приемлите сыновом вашым,

⁸²и не взыщите мира имети с ними во все время, да укрепившеся ядите благая земли и достояние разделяете сыновом вашым даже до века:

⁸³и яже случаются нам, вся бывают ради дел наших лукавых и великих грех наших: ты бо, Господи, облегчил еси грехи нашя

⁸⁴и дал еси нам сицевый корень, и паки обратихомся преступити закон твой, еже смеситися с нечистотою язык земских:

⁸⁵не прогневался ли еси на ны погубити нас, дондеже не останется корень и семя и имя наше?

⁸⁶Господи Боже израилев, истинен еси, остахомся бо корень до днешняго дне:

⁸⁷се, ныне есмы пред тобою во беззакониих наших, несть бо стати еще пред тобою в сих.

⁸⁸И егда моляся ездра исповедашеся, плачущь на земли ниц простерт пред храмом, собрашася к нему от Иерусалима народ мног зело, мужие и жены, и юноши и юноты: плачь бо бысть велик в том множестве.

⁸⁹И возопив иехониа иеилев от сынов израилевых, рече: ездро, мы согрешихом ко Господу Богу, пояхом жены иноплеменничи от язык земли: и ныне есть пред тобою весь израиль:

⁹⁰в том да будет нам клятва пред Господем, еже изгнати всех жен наших, яже от иноплеменных, со чады их, якоже судися тебе, и елицы повинуются закону Господню:

⁹¹востав совершай, к тебе пристоит дело, и мы с тобою мужественно сотворим.

⁹²И востав ездра, закля племеноначалников священнических и левитских всего израиля сотворити по сим. И кляшася.