Read Елизаветинская Библия, 1751 2 Ездра 9 Bible Online

2 Ездра 9 - Елизаветинская Библия, 1751 bible

2 Ездра 9

¹И востав ездра от притвора храма, иде в сосудохранилницу иоанана сына елиасивова,

²и водворився тамо не вкушаше хлеба, ниже воды пияше, рыдая о беззакониих великих народа.

³И бысть проповедание во всей иудеи и Иерусалиме всем, иже бяху от пленения, еже собратися во Иерусалим:

⁴и елицы не приидут в два или три дни, по суду председящих старейшин возмется имение их, и той чуждь будет от множества бывшаго в пленении.

⁵И собрашася вси, иже бяху от колена иудина и вениаминова, в три дни во Иерусалим, сей месяц девятый, в двадесятый день месяца,

⁶и седоша все множество на пространствии церковнем, дрожаще ради зимы настоящия.

⁷И востав ездра рече им: вы беззаконно сотворили есте, и поясте себе жены иноплеменничи, да приложите грехи ко израилю:

⁸и ныне дадите исповедание и славу Господу Богу отец наших

⁹и сотворите волю его, и отлучитеся от язык земных и от жен иноплеменных.

¹⁰И возопи все множество и рекоша гласом великим: тако, якоже рекл еси, сотворим:

¹¹но множество велико есть, и время зимно, и не можем стояти без покрова, а дело несть нам единаго дне, ни дву, много бо в сих согрешихом:

¹²да предстанут же и предводителие народа, и вси, иже с нами обитают, елицы имеют жен иноплеменных, да приидут обретше время,

¹³и от всякаго места старейшины и судии, дондеже разрешится гнев Господень от нас, дела сего.

¹⁴Ионафас сын азаилев и езекиа фокануев сын прияста по сему, и месуллам и левис и савватий вкупе содействоваша има:

¹⁵и сотвориша по всему сему бывшии от пленения.

¹⁶И избра себе ездра священник мужы началники отечеств их всех по имени, и седоша вкупе в новомесячии десятаго месяца испытати дело то.

¹⁷И приведено бысть ко окончанию о мужех, иже имяху жены иноплеменничи, даже до новомесячия перваго месяца.

¹⁸И обретошася от иереев собравшиися имуще жен иноплеменничих:

¹⁹от сынов иисуса сына иоседекова и братии его мафила и елеазар, и иорив и иоадан,

²⁰и возложиша руки, да изгонят жены своя, и во умилостивление овны за неведение свое:

²¹и от сынов еммировых ананиа и завдей, и ианин и самиа, и иереил и азариа,

²²и от сынов фесуровых елионас, масиа, исмаил и нафанаил, и окидил и салоа:

²³и от левит иозавад и семей, и колий (сей есть калита) и фафей, и иуда и иона:

²⁴от священнопевцев елиаксур, вакхур:

²⁵от дверник саллум и толван:

²⁶от израиля, от сынов форосовых иерма, иеддиа и мелхиа, и маил и елеазар, и асивиа и ваанеа,

²⁷от сынов илаевых матфаниа, захариа и иереил, и иеримоф и аидиа,

²⁸и от сынов замофовых елиада, елисим, офониа, иаримоф, сават и сардей,

²⁹и от сынов виваевых иоанн и ананиа, и иозавад и емафий,

³⁰от сынов маниевых олам, мамух, иеддей, иасув и иасаил и иеримоф,

³¹и от сынов аддиевых наафий и моосиа, лакун и наид, и матфаниа и сесфил, и валнуй и манассиа,

³²и от сынов ананих елиона и иасей, и мелхиа и саввей и симон хосамей,

³³и от сынов асомовых алтаней и матфий, и ванеа и елифалат, и манассиа и семей,

³⁴и от сынов ваанииных иеремиа, момдий, исмаир, иуил, мавдай и педиа и анос, равасион и иенасив и мамнитанаим, елиасий, вануй, елиалий, самий, селемиа, нафаниа, и от сынов озораевых сесий, езрил, азаил, самат, замврий, иосиф,

³⁵и от сынов ефмы мазитиа, завадаиа, идаий, иуил, ванеа:

³⁶вси сии пояша себе жены иноплеменничи и отпустиша их со чады.

³⁷И вселишася священницы и левити, и иже (бяху) от израиля во Иерусалиме и во стране, в новомесячии седмаго месяца, и сынове израилевы во обителех своих.

³⁸И собрася все множество единодушно на пространство, еже ко востоку врат священных,

³⁹и рекоша ездре архиерею и чтецу, да принесет закон моисеов, преданный от Господа Бога израилева.

⁴⁰И принесе ездра архиерей закон всему множеству, от мужа даже до жены, и всем священником слышати закон в новомесячии седмаго месяца,

⁴¹и чтяше на пространстве, еже пред священными враты церковными, от утра даже до полудне пред мужми же и женами: и даша все множество чувства в закон.

⁴²И ста ездра священник и чтец закона на древянем амвоне, иже соделан бысть:

⁴³и сташа при нем маттафиа, самуй, ананиа, азариа, уриа, езекиа, валасам одесную,

⁴⁴ошуюю же фалдей и мисаил, мелхиа, аофасув, навариа, захариа.

⁴⁵И взем ездра книгу закона пред всем множеством, председяше бо во славе пред всеми,

⁴⁶и егда толковаше закон, вси прямо стояху. И благослови ездра Господа Бога вышняго, Бога саваофа вседержителя.

⁴⁷И возгласи весь народ: аминь. И воздвигше горе руки и припадше на землю, поклонишася Господу.

⁴⁸Иисус и ануй, и саравиа и иадин и иакув, саватиа, автей, меаней и калита, азариа и иозавд, и ананиа и виата, левити, учаху закону Господню и ко множеству чтяху закон Господень, внушающе купно чтение.

⁴⁹И рече атфарат ездре архиерею и чтецу, и левитом, иже учаху множество, глаголя:

⁵⁰день сей свят есть Господу, и вси плакаху, егда слышаху закон. (И рече ездра:)

⁵¹шедше убо ядите тучная и пийте сладкая и послите неимущым:

⁵²свят бо день Господень, и не скорбите, Господь бо прославит вас.

⁵³И левити повелеша всему сонму, глаголюще: день сей свят Господеви, не скорбите.

⁵⁴И идоша вси ясти и пити и веселитися и дати неимущым, да радуются (зело) много:

⁵⁵еще бо содержаша словеса, имже научишася, и собрашася.