Read Елизаветинская Библия, 1751 Товит 13 Bible Online

Товит 13 - Елизаветинская Библия, 1751 bible

Товит 13

¹И товит написа молитву в радость и рече: благословен Бог живый во веки и Царство его,

²зане он наказует и милует, низводит во ад и возводит, и несть иже избежит руки его:

³исповедайтеся ему, сынове израилевы, пред языки, зане той разсея нас в них,

⁴тамо являйте величие его, возносите его пред всяким живущим, яко той Господь наш и Бог, той Отец наш во вся веки,

⁵и наказовати имать нас в неправдах наших, и паки помилует и соберет ны от всех языков, идеже аще расточени будете в них:

⁶аще обратнтеся к нему всем сердцем вашим и всею душею вашею творити пред ним истину, тогда обратится к вам и не скрыет лица своего от вас, и узрите, яже сотворит с вами: и исповедайтеся ему всеми усты вашими, и благословите Господа правды и возносите Царя веков: аз в земли пленения моего исповедаюся ему и сказую крепость и величие его языку грешников: обратитеся, грешницы, и творите правду пред ним: кто весть, аще благоволит о вас и сотворит милость вам?

⁷Бога моего возношу, и душа моя Царя небеснаго, и возвеселится о величии его:

⁸да возглаголют вси и да исповедятся ему во Иерусалиме:

⁹Иерусалиме, граде святый, накажет тя за дела сынов твоих и паки помилует сыны праведных:

¹⁰исповедайя Господеви благо и благослови Царя веков, да паки скиния его созиждется в тебе с радостию, и да возвеселит в тебе плененныя, и да возлюбит в тебе бедныя во вся роды века:

¹¹языцы мнози отдалеча приидут ко имени Господа Бога, дары в руках имуще и дары Царю небесе, родове родов восхвалят тя и дадут радование:

¹²прокляти вси ненавидящии тя, благословени будут вси любящии тя во век:

¹³радуйся и веселися о сынех праведных, зане соберутся и возблагословят Господа праведных:

¹⁴о, блажени любящии тя, возрадуются о мире твоем: блажени, елицы скорвеша о всех наказаниих твоих, зане о тебе возрадуются, видяще всю славу твою, и возвеселятся во век:

¹⁵душа моя да благословит Бога Царя веикаго,

¹⁶яко наздан будет Иерусалим сапфиром и смарагдом и каменем честным, стены твоя и столпи и забрала златом чистым,

¹⁷и стогны Иерусалимския вириллом и анфраксом и камением от суфира утелются,

¹⁸и рекут вся стогны его: аллилуиа и восхвалят, глаголюще: благословен Бог, иже вознесе во вся веки.