Read Елизаветинская Библия, 1751 Иудифь 14 Bible Online

Иудифь 14 - Елизаветинская Библия, 1751 bible

Иудифь 14

¹И рече к ним иудиф: послушайте убо мене, братия, и вземше главу сию повесите ю на забрале стены вашея:

²и будет егда возсияет утро, и взыдет солнце на землю, приимете кождо орудия бранная ваша, и изыдете всяк муж сильный вне града, и дадите воеводу над ними, аки сходяще на поле ко первей стражи сынов ассуровых, и не снидете:

³и вземше сии всеоружия своя, пойдут ко ополчению своему, и возбудят воеводы силы ассуровы, и стекутся ко шатру олофернову, и не окрящут его, и нападет на них страх, и побегнут от лица вашего:

⁴и возследовавшии вам, и вси живущии во всем пределе израилстем, постилайте я по путем их:

⁵прежде же еже сотворити сия, призовите мне ахиора амманитина, да видев познает уничтожающаго дом израилев, и сего яко на смерть посланнаго к нам.

⁶И призваша ахиора из дому озиина. Егда же прииде и виде главу олофернову в руце мужа единаго в собрании людий, паде на лице, и разслабися дух его.

⁷Егда же подяша его, припаде к ногама иудифы, и поклонися лицу ея, и рече: благословена ты во всяцем селении иудине и во всяцем языце, иже услышавше имя твое смятутся:

⁸и ныне возвести ми, елика сотворила еси во днех сих. И возвести ему иудиф посреде людии вся, елика сотвори, от негоже дне изыде, дондеже глаголаше им.

⁹Егда же преста глаголющи, воскликнуша людие гласом великим и дадоша глас веселый во граде своем.

¹⁰Видев же ахиор вся, елика сотвори Бог израилев, верова Богу зело, и обреза плоть крайнюю свою, и приложися к дому израилеву даже до дне сего.

¹¹Егда же денница взыде, свесиша главу олофернову со стены: и восприят всяк муж израилев оружия своя, и изыдоша полками на восходы горы.

¹²Сынове же ассуровы, яко увидеша их, разослаша к вождем своим: они же приидоша к воеводам и тысящником и ко всякому киязю своему,

¹³и приидоша к шатру олофернову, и реша сущему над всеми его: возбуди убо господина нашего, зане дерзнуша раби сходити к нам на брань, да истребятся в конец.

¹⁴И вниде вагоа и толкну во двор шатра, мняше бо спати его со иудифою.

¹⁵Егда же никтоже послушаше, растворив вниде в ложницу и обрете его при празе повержена мертва, и глава его отята бысть от него:

¹⁶и возопи гласом великим с плачем и стенанием и воплем крепким, и раздра ризы своя:

¹⁷и вниде в шатер, идеже бе иудиф обитающи, и не обрете ея, и изскочи к людем и возопи:

¹⁸отвергошася раби, сотвори студ едина жена еврейская на дом царя навуходоносора: зане се, олоферн долу, и главы несть на нем.

¹⁹Егда же услышаша сия глаголы князие силы ассуровы, раздраша ризы своя, и смятеся душа их зело, и бысть их крик и вопль зело посреде полка.