Read Елизаветинская Библия, 1751 Иудифь 15 Bible Online

Иудифь 15 - Елизаветинская Библия, 1751 bible

Иудифь 15

¹И егда услышаша в шатрех сущии, ужасошася о бывшем,

²и нападе на ня страх и трепет, и не бе человека пребывающа пред лицем ближняго ктому, но истекше единодушно бежаху по всякому пути поля и нагорныя:

³и иже ополчившиися в горней окрест ветилуи обратишася в бегство: и тогда сынове израилевы всяк муж ратник от них устремишася на них.

⁴И посла озиа в ветомасфем и виваю, и ховаю и холу, и во всяк предел израилев, вестники о совершившихся, и да вси потекут вслед врагов на погубление их.

⁵Егда же услышаша сынове израилевы, вси единодушно нападоша на них и секоша их даже до ховы. Такожде же и иже из Иерусалима приидоша и из всея нагорныя: возвестиша бо им бывшая ополчению врагов их: и иже в галааде и в галилеи бодоша их язвою великою, дондеже минуша дамаск и пределы его.

⁶Прочии же живущии во ветилуи, нападоша на полк ассуров и плениша их и обогатишася зело.

⁷Сынове же израилевы возвратившеся от сечи, возобладаша прочими, и веси и села, яже в горней и напольней, возобладаша многими корыстьми: бе бо множество много зело.

⁸Иоаким же иерей великий и старейшины сынов израилевых живущии во Иерусалиме приидоша еже зрети благая, яже сотвори Господь израилю, и еже видети иудиф и глаголати с нею мир.

⁹Егда же приидоша к ней, благословиша ю вси единодушно и реша к ней: ты возвышение израилево| ты радование велико израилево| ты слава велия рода нашего|

¹⁰сотворила еси вся сия рукою твоею, сотворила еси благая со израилем, и да благоволит о них Бог: благословена буди у вседержителя Господа в вечное время. И реша вси людие: буди.

¹¹И пленяху вси людие полк чрез дний тридесять, и даша иудифе шатер олофернов и вся сребряныя сосуды, и одры и умывалницы, и вся устроения его. И приемши она возложи на мска своего, и впряже колесницы, и сложи я на ня.

¹²И притече всякая жена израилска еже видети ю, и благословиша ю и сотвориша ей лик от себе. И взя копия цветами украшенная в руце свои и даде женам сущым с нею:

¹³и увенчася маслиною сама и яже с нею, и идяше пред всеми людьми в лице, ведущи всех жен. И последоваше всяк муж израилев вооружени с венцы и песньми во устах своих.

¹⁴И нача иудиф исповедание сие во всем израили, и возглашаху вси людие хваление сие.