Read Елизаветинская Библия, 1751 Иудифь 2 Bible Online

Иудифь 2 - Елизаветинская Библия, 1751 bible

Иудифь 2

¹И в лето осмоенадесять, и в двадесять вторый (день) перваго месяца, бысть слово в дому навуходоносора царя ассирийска, отмстити всяцей земли, якоже глаголаше.

²И созва вся служители своя и вся вельможы своя, и сообщи с ними тайну совета своего, и соверши всю злобу земли от яст своих:

³и тии судиша истребити всяку плоть, иже не последоваша словеси уст его.

⁴И бысть, егда соверши совет свой, призва навуходоносор царь ассирийский олоферна вождоначалника силы своея, втораго суща по нем, и рече к нему:

⁵сия глаголет царь великий, господин всея земли: се, ты изыдеши от лица моего и возмеши с собою мужей уповающих в крепости своей, пешцев до тысящей сто двадесять, и множество коней со всадниками тысящей дванадесять,

⁶и изыдеши бо сретение всей земли на запады, яко не повинушася глаголу уст моих:

⁷и возвестиши им уготовляти землю и воду, яко изыду в ярости моей на них, и покрыю все лице земли ногами силы моея, и дам их в расхищение им:

⁸и язвеннии их исполнят дебри и потоки их, и река наводняющаяся мертвыми их наполнится:

⁹и приведу плен их до конец всея земли:

¹⁰ты же изшед приодержиши мне всяк предел их, и отдадут тебе самих себе, и соблюдеши ми их на день обличения их:

¹¹непокаряющихся же не пощадит око твое, еже дати их на убиение и расхищение во всей земли твоей:

¹²яко жив аз, и держава царства моего: глаголах и сотворю сия рукою моею:

¹³ты же да не преступиши единаго коего от глагол господина твоего, но совершая да совершиши, якоже заповедах тебе, и да не укосниши сотворити сия.

¹⁴И изыде олоферн от лица господина своего, и созва вся вельможы и воеводы и началники силы ассурския,

¹⁵и изчисли избранных мужей на ополчение, якоже заповеда ему господин его, до дванадесять тем, и конников стрелцев дванадесять тысящей,

¹⁶и устрои их, имже образом брани множество устроевается:

¹⁷и взя велблюды и ослы и мски припасов ради своих множество много зело, и овцы и волы и козлы на уготование их, имже не бе числа,

¹⁸и пищи всякому мужу во множестве, и злата и сребра из дому царева много зело:

¹⁹и изыде сам и вся сила его в путь, еже предити царю навуходоносору и покрыти все лице земли к западом колесницами и конницами и пешцами избранными своими:

²⁰и многое примешение яко прузи изыдоша с ними и яко песок земли, не бо бе числа от множества их.

²¹И изыдоша из ниневии путем триех дний на лице поля вектилеф, и ополчишися от вектилефа близ горы сущия ошуюю вышния киликии.

²²И поя всю силу свою, пешцы и конники и колесницы своя, и отиде оттуду в горнюю,

²³и изсече фуда и луда, и поплени всех сынов рассиса и сынов исмаилевых сущих по лицу пустыни хеллеонския к югу.

²⁴И прейде евфрат, и пройде месопотамию, и раскопа вся грады высокия сущыя при потоце авроне, дондеже приити к морю:

²⁵и объят пределы киликийския, и посече всех противостоящих себе: и прииде даже до предел иафефовых, сущих к югу на лицы аравии,

²⁶и обыде всех сынов мадиамлих, и пожже селения их и плени стада их:

²⁷и сниде на поле дамасково во днех жатвы пшениц, и пожже вся нивы их, а овчия и воловыя стада даде в погубление, и грады их поплени, и поля их опустоши, и порази вся юношы их острием меча.

²⁸И нападе страх и трепет его на всех живущих в примории, сущих в сидоне и тире и обитающих в суре и окине и на всех живущих во иемнаане. И живущии во азоте и аскалоне убояшася его зело.