Read Елизаветинская Библия, 1751 Иудифь 5 Bible Online

Иудифь 5 - Елизаветинская Библия, 1751 bible

Иудифь 5

¹И возвещеио бысть олоферну вождоначалнику силы ассурския, яко сынове израилевы уготовашася на брань, и проходы горния заключиша, и оградиша стенами всякий верх горы высокия, и положиша на полях преткновения.

²И разгневася яростию зело, и созва всех началников моавлих и воевод сынов аммоних и всех властелей помория,

³и рече им: возвестите убо ми, сынове ханаани, кто людие сии живущии в горней, и каковы, в нихже живут, гради, и множество силы их, и в чем держава их и крепость их, и кто поставлен над ними царь вождь воинства их?

⁴и чесо ради сопротивишася, еже не изыти во сретение мне, паче всех живущих на западех?

⁵И рече к нему ахиор вождь всех сынов аммоних: послушай убо, господине мой, слова от уст раба твоего, и возвещу тебе истину о людех сих, иже обитают в горней сей близ тебе живуще, и не изыдет ложь из уст раба твоего:

⁶людие сии суть исчадия халдеов

⁷и вселишася первее в месопотамии, понеже не восхотеша последовати богом отцев своих, иже беша в земли халдейстей:

⁸и отвратишася от пути отец своих и поклонишася Богу небесе, Богу, егоже познаша: и изгнаша их от лица богов своих, и побегоша в месопотамию и обиташа тамо дни многи:

⁹и рече Бог их, да изыдут от пришелствия своего и да идут в землю хаиааню: и вселишася тамо, и умножишася златом и сребром и скоты многими зело:

¹⁰и снидоша во египет, покры бо лице земли ханаани глад, и пришелствоваша тамо, доидеже прекормишася, и быша тамо во множество много, и не бе числа роду их:

¹¹и воста на них царь египетский и прехитри их, и в труде и плинфе смири их, и положи их в рабы:

¹²и возопиша к Богу своему, и порази всю землю египетскую язвами, в нихже не бе изцеление, и изгнаша их египтяне от лица своего:

¹³и изсуши Бог чермное море пред ними,

¹⁴и веде их на путь сины и кадис-варни, и изгнаша всех живущих в пустыни,

¹⁵и вселишася в земли аморреов, и всех есевонитов истребиша крепостию своею, и прешедше Иордан наследиша всю горнюю:

¹⁶и изгнаша от лица своего хананеа и ферезеа, и иевусеа и сихема и всех гергесеов, и обиташа в ней дни многи:

¹⁷и доидеже не согрешиша пред Богом своим, беша благая с ними, понеже Бог ненавидяй неправды с ними есть:

¹⁸егда же отступиша от пути, егоже завеща им, истребишася во мнозех бранех на много зело, и пленени быша в землю не свою, и храм Бога их бысть в попрание, и гради их одержани быша от супостат:

¹⁹и ныне обратившеся к Богу своему, взыдоша от разсеяния, идеже разсеяни быша тамо, и одержаша Иерусалим, идеже святилище их, и вселишася в горней, понеже бе пуста:

²⁰и ныне, владыко господине, аще убо есть безумие в людех сих, и согрешают к Богу своему, и разсмотрим сие, яко есть в них соблазн сей, и взыдем и повоюем их:

²¹аще же несть беззакония в языце их, да прейдет господин мой, да не когда защитит Господь их и Бог их по них, и будем в поношение пред всею землею.

²²И бысте яко преста ахиор глаголя словеса сия, и возропташа вси людие обстоящии шатер и предстоящии, и реша вельможи олоферновы и вси живущии в примории и в моаве посещи его:

²³не бо убоимся от сынов израилевых: се бо, людие, в нихже несть силы, ниже могутства ко ополчению крепкому:

²⁴темже убо взыдим, и будут во снедь всему воинству твоему, владыко олоферне.