Read Елизаветинская Библия, 1751 Иудифь 9 Bible Online

Иудифь 9 - Елизаветинская Библия, 1751 bible

Иудифь 9

¹Иудиф же паде на лице, и возложи персть на главу свою, и сложи, имже одевашеся, вретище. И бяше недавно приносимо во Иерусалиме в дому Господни кадило в вечер той, и возопи глсом великим иудиф ко Господу и рече:

²Господи, Боже отца моего симеона, емуже дал еси в руку мечь во отмщение инородных, иже растлиша ложесна девича во осквернение и обнажиша недро в срамоту и оскверниша ложесна в поношение,

³рекл бо еси: да не будет тако: и сотвориша, за яже дал еси князи их на убиение, и постелю их, яже ведяше прельщение их, в кровь, и поразил еси рабов о владыцех и владыки на престолех их,

⁴и дал еси жены их в расхищение и дщери их в пленение и вся корысти их в разделение сыном возлюбленным от тебе, иже и возревноваша ревностию твоею и мерзишася осквернением крове своея и призваша тя в помощника: Боже, Боже мой, и мене услыши вдову:

⁵ты бо сотворил еси, яже прежде оных и оная, и яже по сих и яже ныне, и грядущая проразумел еси, и собышася, яже мыслил еси,

⁶и предсташа, яже уставил еси, и реша: се, есмы: вси бо путие твои готови, и суд твой во проразумении:

⁷се бо, ассириане умножишася в силе своей, вознесошася о кони и о всаднице, возвеличашася в мышце пешев, уповаша на щит и копие и лук и пращу, и не познаша, яко ты еси Господь сокрушаяй брани:

⁸Господь имя тебе, ты сокруши их крепость силою твоею и низложи державу их яростию твоею: усоветоваша бо омерзити святая твоя, осквернити селение упокоения имене славы твоея и опровергнути железом рог олтаря твоего:

⁹воззри на гордость их, посли гнев твой на главы их, даждь в руку мою вдовию, юже умыслих, крепость,

¹⁰порази раба от устен хитрости моея о князи и князя о рабе его, сокруши гордыню их рукою женскою:

¹¹не бо во множестве крепость твоя, ниже могутство твое в сильных, но смиренных еси Бог, малейших еси помощник, заступник немощных, отчаянных покровитель, ненадежных спаситель:

¹²ей, ей, Боже отца моего и Боже наследия израилева, Владыко небес и земли, создателю вод, Царю всеяори твоея, ты услыши моление мое

¹³и даждь слово мое и хитрость в язву и рану их иже противу завета твоего и дому освященнаго твоего, и в верха сионя и дому одержания сынов твоих усоветоваша жестокая,

¹⁴и сотвори во всем языце твоем и во всем племени познание, еже ведати, яко ты еси, Боже Бог всея силы и державы, и несть инаго защитника рода израилева кроме тебе.