Read Елизаветинская Библия, 1751 Есфирь 3 Bible Online

Есфирь 3 - Елизаветинская Библия, 1751 bible

Есфирь 3

¹И по сих прослави царь артаксеркс амана сына амадафуина вугеанина и вознесе его, и председяше вышше всех другов его:

²и вси, иже во дворе (цареве), покланяхуся аману: сице бо повеле царь творити. Мардохей же не кланяшеся ему.

³И глаголаша сущии во дворе цареве мардохею: мардохее, чесо ради не слушаеши глаголемых от царя?

⁴По вся же дни глаголаху ему, и не послушаше их. И возвестиша аману, яко мардохей сопротивляется повелению цареву, и поведа им мардохей, яко иудеанин есть.

⁵И уведав аман, яко не кланяется ему мардохеи, разгневася зело

⁶и умысли погубити вся иудеи, иже в царстве артаксерксове:

⁷и сотвори совет в лето второенадесять царства артаксерксова, и меташе жребия день от дне и месяц от месяца, яко погубити во един день род мардохеев: и паде жребий на четвертыйнадесять день месяца, иже есть адар.

⁸И рече (аман) ко царю артаксерксу, глаголя: есть язык разсеянный во языцех во всем царстве твоем: законы же их странни паче всех язык, и законов царских не слушают, и не пользует царю оставити их:

⁹и аще годе есть цареви, да повелит погубити я: аз же запишу в сокровище царево десять тысящ талант сребра.

¹⁰И снем царь перстень (с руки своея), даде в руце аману, да запечатает писания написанная на иудей.

¹¹И рече царь аману: сребро убо имей ты себе, людем же твори, якоже хощеши.

¹²И призвани быша писцы царевы в третийнадесять день месяца перваго, и написаша, якоже повеле аман, к воеводам и началником по всем странам, от индийския области даже и до ефиопии, сто двадесяти седми странам, началствующым над языки по их языку, именем артаксеркса царя.

¹³И посла с писмоносцы писания в царство артаксерксово, да побиют род жидовский в день един месяца вторагонадесять, иже есть адар, и да расхитят имения их. Списание же епистолии сицево бе: царь великий артаксеркс началствующым от индии даже до ефиопии над сто двадесять седмию странами и местоначалником подданным. Над многими царствующь языки и обдержав всю вселенную, восхотех, не дерзостию области возносимь, но кротостию и тихостию всегда правя, безмятежно житие всегда устрояти подручных (наших), и царствие (свое) безмолвно и проходимо даже до конец соблюдая, обновити желаемый всем человеком мир. Вопросившу же ми советники моя, како бы возможно сие совершити, иже у нас целомудрием пресловутый и во благоволении неизменный и твердою верностию утвержденный и вторую честь по цари получивый аман сказа нам, яко во всех по вселенней коленех смесися враждебный некий народ, законами сопротивный ко всякому языку и повеления царская всегда небрегущь, дабы не устроялося от нас благоуправляемое непорочно сооб(...)

¹⁴Списания же епистолии посылахуся по странам, и повелено бысть всем языком готовым быти в нареченный день.

¹⁵Приспе же дело и в сусы: и царь убо и аман пирующа наслаждастася, град же (сусы) мятяшеся.