Read Елизаветинская Библия, 1751 Есфирь 7 Bible Online

Есфирь 7 - Елизаветинская Библия, 1751 bible

Есфирь 7

¹Вниде же царь и аман пировати со царицею.

²И рече царь есфири во вторый день на пиру: что есть, есфире царице? и что прошение твое? и что моление твое? и будет тебе до полуцарствия моего.

³И отвещавши (есфирь царица) рече: аще обретох благодать пред очима твоима, царю, да дастся душа моя прошению моему и людие мои молению моему:

⁴продани бо есмы, аз же и людие мои, на погибель и расхищение и в работу, мы же и чада наша в рабы и рабыни, и небрегох: несть бо достоин клеветник двора царева.

⁵И рече царь: кто есть сей, иже дерзну сотворити вещь сию?

⁶И рече есфирь: человек враг, аман лукавый сей. Аман же смятеся от царя и царицы.

⁷Царь же воста со гневом от пира (и иде) в вертоград: аман же моляше царицу, видяше бо себе в бедах суща.

⁸Возвратися же царь из вертограда, и аман припаде к ложу, на немже бе есфирь, моля царицу. И рече царь: егда и жену насилует в дому моем? Аман же слышав изменися лицем.

⁹Рече же вугафан един от скопцев, сей же ведяше о том древе, видев е в дому аманове, егда призываше его на обед царский, и о сем испытав единаго от отрок, уразумев замышляемое, и рече ко царю: се, и древо уготова аман мардохею глаголавшему благая о цари, и стоит в дому аманове возвышено на лакот пятьдесят. И рече царь: да повесится (аман) на нем.

¹⁰И повешен бысть аман на древе, еже уготова мардохею. И тогда царь утолися от ярости.