Read Елизаветинская Библия, 1751 Есфирь 8 Bible Online

Есфирь 8 - Елизаветинская Библия, 1751 bible

Есфирь 8

¹И в той день царь артаксеркс дарова есфири, елика бяху амана клеветника (иудейска): и мардохеи призван бысть от царя, поведа бо есфирь, яко сродник есть ей.

²И сня царь перстень свой, егоже отя у амана, и даде мардохееви. И постави есфирь мардохеа над всем имением амановым,

³и приложи глаголати ко царю, и припаде пред ногама его (и восплака), и моляше его отвратити злобу аманову и мысль его, еюже помысли на иудеи.

⁴И простре царь есфири жезл злат: воста же есфирь и ста пред царем.

⁵И рече есфирь: аще угодио ти есть, и обретох благодать пред тобою, посли возвратити писания посланная от амана, писаная на погубление иудеов, иже обитают во (всем) царствии твоем:

⁶како бо возмогу видети озлобление людий моих и како возмогу спастися в погибели отечества моего?

⁷И рече царь есфири: аще вся имения аманова дах и даровах тебе, и того повесих на древе, яко руце вознесе на иудеи, что еще просиши?

⁸напишите и вы именем моим, якоже угодно есть вам, и запечатайте перстнем моим: елика бо писана бывают царевым повелением и запечатаются перстнем моим, не возможно им противорещи.

⁹И призвани быша писцы (царевы) в первый месяц, иже есть нисан, в двадесять третий день тогожде месяца, и написаша о иудеех, елика заповеда мардохей, ко управителем и ко началником воевод от индийския страны даже до ефиопии, сто двадесять седми воеводам, во всякую страну по своему их языку.

¹⁰Написана же быша велением царевым и запечатлешася перстнем его: и послаша писания чрез писмоносцы,

¹¹яко повеле им жити по законом их во всяцем граде, и да помогают им, и да сотворят соперником их и противником их, якоже хотят,

¹²в день един по всему царству артаксерксову, в третийнадесять день вторагонадесять месяца, иже есть адар.

¹³Списание же епистолии сице бе: царь великий артаксеркс сущым от индии даже до ефиопии сто двадесяти и седмим началством странами обладающым и властелем нам доброжелателствующым, радоватися.

¹⁴Мнози множайшею благодетелствующих благостию частее чествуеми паче меры возгордешася, и не точию подчиненных нам ищут озлобити, но доволства не могуще снести, и своим благодетелем начинают коварствовати: и благодарение не токмо от человек отемлюще, но еще (по обычаю) не приявших благодеяний киченьми вознесшеся, вся присно назирающаго Бога ненавидящаго зла мнят избежати суда.

¹⁵Многажды же и многих от поставленных на властех, имже уверися другов устрояти дела, ласкателство кровей неповинных виновными поставляя, подверже неуврачеванным злым, злонравия ложным прельщением тех, иже прельщают незлобивое благосердие владеющих.

¹⁶Видети же леть есть нам взыскующым не толико от древних, якоже предахом, историй, елико от тех, яже суть при ногах непреподобно соделанная губителством недостойно владеющих.

¹⁷Сего ради внимати надлежит по сих, во еже царство безмятежно всем человеком с миром устроити, не употребляюще пременений, приходящая же пред очеса всегда с приличным предварением разсуждающе.

¹⁸Егда бо аман амадафуев македонянин, истнно чуждь персския крове и много отстоящь от нашея благости, страннолюбно приятый от нас, толикое человеколюбие, еже ко всякому языку имеем, получи, яко нарицатися ему отцем нашим, и покланяемому от всех, второе царскаго престола лице содержати: неумерителен же в гордости прилежно искал, како бы нас области и живота лишити, куино же нашего блюстителя и всегдашняго благодетеля мардохеа и непорочную царства сообщницу есфирь со всем их племенем многоилетенными хитростей прельщеньми ищущь на погубление: сими бо образы возмне нас лишив блюстителей взяти, и власть персскую ко македоняном пренести.

¹⁹Мы же иудеов, от трегубителнаго сего в погубление преданных, обретаем не злотворных, но праведнейшими уиравляемых законы, и сущих сынов вышняго, превеличайнаго живаго Бога, управляющаго нам же и прародителем нашым царствие в добрейшем состоянии.

²⁰Добре убо сотворите не употребляюще от амана амадафуева посланных писаний, понеже он сия соделавый при вратех сусских со всем домом своим повешен есть, достойный ему вскоре суд воздавшему всеми владеющему Богу.

²¹Списание же епистолии сея предложивше на всяцем месте со дерзновением, оставите иудеов употребляти своя законы, спомоществующе им, яко да во время скорби воставшым на них отмстят в третийнадесять день вторагонадесять месяца адара в самый той день: в сей бо (день) всемогущий Бог вместо погубления избраннаго рода сотвори им веселие.

²²И вы убо во именитых ваших праздницех знменитый день со всякою радостию провождайте, да и ныне, и по сих спасение нам убо и доброжелателным персо будет, наветующым же нас в память погубления.

²³Всяк же град или страна, яже по сим не сотворит, всячески мечем и огнем с толиким потребится гневом, яко не токмо человеком непроходна, но и зверем и птицам во всякое время мерзостнейша оставится.

²⁴И списания сия да предложатся очевидно во всем царстве, еже готовым быти всем иудеом на сей день ратовати своих противных.

²⁵Конницы убо изыдоша спешно повеленная от царя совершити. Предлагашеся же повеление и в сусех.

²⁶И мардохей изыде облечен в царскую одежду и венец имущь златый, диадиму виссонную, червленую. Видевше же сущии в сусех возрадовашася,

²⁷яко иудеом бысть свет и веселие:

²⁸во (всяцем) граде и стране, идеже аще предлагашеся повеление радость и веселие бе иудеом, пирование и утешенме. И мнози от язык обрезовахуся и закон иудейский приимаху, страха ради иудейскаго.