Read Елизаветинская Библия, 1751 Исход 10 Bible Online

Исход 10 - Елизаветинская Библия, 1751 bible

Исход 10

¹Рече же Господь к моисею глаголя: вниди к фараону: аз бо ожесточих сердце его и рабов его, да и еще приидут знамения сия на них:

²яко да повесте во ушеса чад ваших и чадом чад ваших, елико наругахся египтяном, и знамения моя, яже сотворих в них, и увесте, яко аз Господь.

³Вниде же моисей и аарон пред фараона и реста ему: сия глаголет Господь Бог еврейский: доколе не хощеши усрамитися мене? отпусти люди моя, да послужат ми:

⁴аще же не хощеши ты отпустити люди моя, се, аз наведу в сей час заутра пруги многи на вся пределы твоя,

⁵и покрыют лице земли, и не возможеши видети земли, и поядят весь останок земли оставшийся, егоже остави вам град, и изядят всяко древо растущее вам на земли:

⁶и наполнятся домове твои и домове рабов твоих, и вси домове по всей земли египетстей: ихже никогдаже видеша отцы твои, ни прадеды их, от негоже дне быша на земли, даже до дне сего. И уклонився моисей, изыде от фараона.

⁷Рекоша же раби фараоновы к нему: доколе нам сия будет мука? отпусти люди, да послужат Господу Богу своему: или видети хощеши, яко погибнет египет?

⁸И возвратиша моисеа и аарона пред фараона, и рече им фараон: идите и послужите Господу Богу вашему: кто же и кто суть идущии?

⁹И рече моисей: с юнотами нашими и с старцы пойдем, с сынми и дщерьми, и со овцами и волами нашими: будет бо праздник Господа Бога нашего.

¹⁰И рече им фараон: да будет тако, Господь с вами: якоже отпущаю вас, еда и стяжание ваше? видите, яко лукавство обретается в вас:

¹¹не тако: но да идут мужие и да послужат Богу: сего бо сами просите. И изгнаша их от лица фараонова.

¹²Рече же Господь моисею: простри руку твою на землю египетскую, и да взыдут прузи на землю египетскую, и снедят всю траву земную и весь плод древесный, егоже остави град.

¹³И воздвиже моисей жезл на небо, Господь же наведе ветр южный на землю во весь той день и во всю нощь: утро бысть, и ветр южный взя пруги,

¹⁴и наведе я на всю землю египетскую: и нападоша на вся пределы египетския мнози зело: прежде сих не быша сицевии прузи, и по сих не будут тако,

¹⁵и покрыша лице земное, и истле земля: и снедоша всю траву земную и весь плод древесный, иже остася от града: не остася зелено ничтоже на древех и во всей траве польней, по всей земли египетстей.

¹⁶Потщася же фараон призвати моисеа и аарона, глаголя: согреших пред Господем Богом вашим и к вам:

¹⁷простите убо мой грех еще ныне и помолитеся Господу Богу вашему, да отимет от мене смерть сию.

¹⁸Изыде же моисей от фараона и помолися ко Господу:

¹⁹и премени Господь от моря ветр велик и взя пруги, и вверже их в море чермное: и не остася ни един пруг на всей земли египетстей.

²⁰И ожесточи Господь сердце фараоново, и не отпусти сынов израилевых.

²¹Рече же Господь моисею: простри руку твою на небо, и да будет тма по земли египетстей, осязаемая тма.

²²Простре же моисей руку свою на небо, и бысть тма, мрак, буря по всей земли египетстей три дни:

²³и не виде никтоже брата своего три дни, и не воста никтоже от одра своего три дни, всем же сыном израилевым бяше свет во всех (жилищах), в нихже пребываху.

²⁴И призва фараон моисеа и аарона, глаголя: идите, послужите Господу Богу вашему: токмо овцы и волы оставите: стяжание же ваше да идет с вами.

²⁵И рече моисей: ни: но и ты нам даси всесожжения и жертвы, яже сотворим Господу Богу нашему:

²⁶и скот наш пойдет с нами, не оставим и копыта: от них бо возмем на службу Господу Богу нашему: мы же не вемы, чим послужим Господу Богу нашему, дондеже дойдем тамо.

²⁷Ожесточи же Господь сердце фараоново, и не восхоте отпустити их:

²⁸и рече ему фараон: отиди от мене, внемли себе ктому, да не приложиши видети лица моего: в оньже бо день аще явишися мне, умреши.

²⁹Рече же моисей: якоже рекл еси, ктому не явлюся пред лицем твоим.