Read Елизаветинская Библия, 1751 Исход 18 Bible Online

Исход 18 - Елизаветинская Библия, 1751 bible

Исход 18

¹Услыша же иофор, иерей мадиамский, тесть моисеов, вся, елика сотвори Господь израилю своим людем, яко изведе Господь израиля из египта:

²и поя иофор, тесть моисеов, сепфору, жену моисеову, по отпущении ея,

³и два сына ея: имя единому от них гирсам, глаголя: пришлец бых в земли чуждей,

⁴и имя второму елиезер, глаголя: Бог бо отца моего помощник мой и избави мя из руки фараони.

⁵И прииде иофор, тесть моисеов, и сынове и жена к моисею в пустыню, идеже ополчися при горе Божией.

⁶Возвестиша же моисею, глаголюще: се, иофор, тесть твой, идет к тебе, и жена твоя, и оба сына твоя с ним.

⁷Изыде же моисей во сретение тестю своему и поклонися ему и целова его, и приветствоваша друг друга: и введе их моисей в кущу.

⁸И поведа моисей тестю своему вся, елика сотвори Господь фараону и всем египтяном израиля ради, и весь труд бывший им на пути, и яко избави их Господь от руки фараони и от руки египетския.

⁹Ужасеся же иофор о всех благих, яже сотвори им Господь, яко избави их Господь от руки египетския и от руки фараони,

¹⁰и рече иофор: благословен Господь, яко избави люди своя из руки египетския и из руки фараони:

¹¹ныне уведех, яко велик Господь паче всех богов, сего ради, яко налегоша на них.

¹²И взя иофор тесть моисеов всесожжения и жертвы Богу: прииде же аарон и вси старцы израилевы ясти хлеба с тестем моисеовым пред Богом.

¹³И бысть на утрие, седе моисей судити люди: стояху же пред моисеом вси людие от утра до вечера.

¹⁴Видев же иофор вся, елика творяше людем, рече: что сие, еже ты твориши людем? почто ты един седиши, вси же людие предстоят тебе от утра до вечера?

¹⁵Рече же моисей тестю: понеже приходят людие ко мне просити суда от Бога:

¹⁶егда бо бывает им распря, и приходят ко мне, разсуждаю коемуждо и сказую им повеления Божия и закон его.

¹⁷Рече же тесть моисеов к нему: не право ты твориши глагол сей:

¹⁸трудом утрудишися несносным и ты, и вси людие сии, иже суть с тобою: тяжек тебе глагол сей, не возможеши творити ты един:

¹⁹ныне убо послушай мене и присоветую тебе, и будет Бог с тобою: буди ты людем в тех яже к Богу, и донесеши словеса их к Богу,

²⁰и засвидетелствуй им повеления Божия и закон его, и повеждь им пути его, имиже пойдут, и дела, яже сотворят:

²¹ты же усмотри себе от всех людий мужы сильны, Бога боящыяся, мужы праведны, ненавидящыя гордости, и поставиши их над ними тысященачалники и стоначалники, и пятьдесятоначалники и десятоначалники и писмовводители,

²²и судят людий по вся часы: слово же неудоборешителное донесут к тебе: малыя же суды да судят они, и облегчат тя и спомогут тебе:

²³аще слово сие сотвориши, укрепит тя Бог, и возможеши настоятелствовати, и вси людие сии приидут во свое место с миром.

²⁴Послуша же моисей гласа тестя своего и сотвори вся, елика рече ему:

²⁵и избра моисей мужы сильны от всего израиля, и сотвори я над ними тысященачалники и стоначалники, и пятьдесятоначалники и десятоначалники и писмовводители:

²⁶и суждаху людем по вся часы: всякое же слово неудоборешителное доносиша к моисею, всякое же слово легкое суждаху сами.

²⁷Отпусти же моисей тестя своего, и отиде в землю свою.