Read Елизаветинская Библия, 1751 Исход 19 Bible Online

Исход 19 - Елизаветинская Библия, 1751 bible

Исход 19

¹Месяца же третияго изшествия сынов израилевых от земли египетския, в сий день приидоша в пустыню синайскую:

²и воздвигошася от рафидина и приидоша в пустыню синайскую, и ополчися тамо израиль прямо горы.

³Моисей же взыде на гору Божию, и воззва его Бог от горы глаголя: сия возглаголеши дому иаковлю и повеси сыном израилевым:

⁴сами видесте, елика сотворих египтяном, и подях вас яко на крилех орлих и приведох вас к себе:

⁵и ныне аще слухом послушаете гласа моего и сохраните завет мой, будете ми людие избранни от всех язык: моя бо есть вся земля:

⁶вы же будете ми царское священие и язык свят: сия словеса да речеши сыном израилевым.

⁷Прииде же моисей и призва старцы людския и предложи им вся словеса сия, яже завеща им Бог.

⁸Отвещаша же вси людие единодушно и рекоша: вся, елика рече Бог, сотворим и послушаем. Донесе же моисей словеса сия к Богу,

⁹и рече Господь к моисею: се, аз прииду к тебе в столпе облачне, да услышат людие глаголюща мя к тебе и да тебе веруют во веки. Поведа же моисей словеса людий ко Господу.

¹⁰Рече же Господь моисею: сошед засвидетелствуй людем и очисти я днесь и утре, и да исперут ризы,

¹¹и да будут готовы в день третий: в третий бо день снидет Господь на гору синайскую пред всеми людьми:

¹²и устроиши люди окрест глаголя: внемлите себе не восходити на гору и ни чимже коснутися ея: всяк прикоснувыйся горе смертию умрет:

¹³не коснется ей рука, камением бо побиется или стрелою устрелится, аще скот, аще человек, не будет жив: егда же гласи и трубы и облак отидет от горы, сии взыдут на гору.

¹⁴Сниде же моисей с горы к людем, и освяти я, и испраша ризы своя:

¹⁵и рече людем: будите готови, три дни не входите к женам.

¹⁶Бысть же в третий день бывшу ко утру, и быша гласи и молния и облак мрачен на горе синайстей, глас трубный глашаше зело: и убояшася вси людие, иже в полце:

¹⁷изведе же моисей люди во сретение Богу из полка, и сташа под горою.

¹⁸Гора же синайская дымяшеся вся, схождения ради Божия на ню во огни, и восхождаше дым, яко дым пещный: и ужасошася вси людие зело.

¹⁹Быша же гласи трубнии происходяще крепцы зело: моисей глаголаше, Бог же отвещаваше ему гласом.

²⁰Сниде же Господь на гору синайскую на верх горы, и воззва Господь моисеа на верх горы, и взыде моисей:

²¹и рече Бог к нему глаголя: сошед засвидетелствуй людем, да не когда приступят к Богу уразумети, и падут от них мнози:

²²жерцы же приступающии ко Господу Богу да освятятся, да не когда погубит от них Господь.

²³И рече моисей к Богу: не возмогут людие взыти на гору синайскую: ты бо завещал еси нам глаголя: определи гору и освяти ю.

²⁴И рече ему Господь: иди, сниди и взыди ты и аарон с тобою: жерцы же и людие да не нудятся взыти к Богу, да не когда погубит от них Господь.

²⁵Сниде же моисей к людем и поведа им.