Read Елизаветинская Библия, 1751 Исход 21 Bible Online

Исход 21 - Елизаветинская Библия, 1751 bible

Исход 21

¹И сия оправдания, яже да положиши пред ними:

²аще стяжеши раба евреина, шесть лет да поработает тебе, в седмое же лето отпустиши его свободна туне:

³аще сам един внидет, то един и изыдет: аще же жена внидет с ним, то и жена отидет с ним:

⁴аще же господин даст ему жену, и родит ему сыны или дщери, жена и дети да будут господину его, сам же един да отидет.

⁵Аще же отвещав раб речет: возлюбих господина моего и жену мою и дети моя, не отхожду свободен:

⁶да приведет его господин его пред судище Божие, и тогда приведет его пред двери на праг, и да провертит ему ухо господин его шилом, и да поработает ему во веки.

⁷Аще же кто продаст свою дщерь в рабыню, да не отидет, якоже отходят рабыни:

⁸аще не угодит пред очима господина своего, юже он взяти в жену обеща, да отпустит ю: языку же чуждему господин да не продаст ея, понеже отверже ю:

⁹аще же сыну своему обещал ю, по обыкновению дщерей да сотворит ей:

¹⁰аще же другую поймет себе, потребных и одежд и союбщения ея да не лишит:

¹¹аще же сих трех не сотворит ей, да отидет без сребра туне.

¹²И аще кого кто ударит, и умрет, смертию да умрет (и той):

¹³аще же не хотя, но Бог предаде в руце его, дам тебе место, в неже убежит тамо убивый:

¹⁴аще же кто приложит убити ближняго своего лестию и прибегнет ко олтарю, от олтаря моего да возмеши того умертвити.

¹⁵Иже биет отца своего или матерь свою, смертию да умрет.

¹⁶Иже злословит отца своего или матерь свою, смертию да умрет.

¹⁷Аще кто кого украдет от сынов израилевых, и соодолев сему продаст его, и обрящется у него, смертию да скончается.

¹⁸Аще же сварятся два мужа, и ударит един другаго каменем или пястию, и не умрет, но сляжет на одре:

¹⁹аще востав человек походит вне о жезле, неповинен будет ударивый его: точию за неделание его да даст цену и на цельбу.

²⁰Аще же кто ударит раба своего или рабу свою жезлом, и умрет от руки его, судом да отмстится:

²¹аще же преживет день един или два, да не мстится: сребро бо его есть.

²²Аще же биются два мужа, и поразят жену непраздну, и изыдет младенец ея неизображен, тщетою да отщетится: якоже наложит муж жены тоя, подобающее да отдаст:

²³аще же изображен будет, да даст душу за душу,

²⁴око за око, зуб за зуб, руку за руку, ногу за ногу,

²⁵жжение за жжение, язву за язву, вред за вред.

²⁶Аще же кто исткнет око рабу своему или око рабыни своей и ослепит, свободны да отпустит я за око их:

²⁷аще же зуб рабу своему или зуб рабе своей избиет, свободны да отпустит я за зуб их.

²⁸Аще же вол убодет мужа или жену, и умрет, камением да побиется вол той, и да не снедят мяса его, господин же вола неповинен будет:

²⁹аще же вол бодлив будет прежде вчерашняго и третияго дне, и возвестят господину его, и не заключит его, и убиет мужа или жену: вол камением да побиется, и господин его купно да умрет:

³⁰аще же окуп наложится ему, да даст окуп за душу свою, елико наложат ему:

³¹аще же сына или дщерь убодет, по сему же суду да сотворят ему:

³²аще же раба или рабу убодет вол, сребра тридесять дидрахм да даст господину их, и вол камением да побиется.

³³Аще же кто отверзет яму или ископает яму и не покрыет ея, и впадется в ню телец или осля,

³⁴господин ямы отдаст (цену), сребро даст господину их: умершее же ему да будет.

³⁵Аще же чий вол убодет вола ближняго, и умрет, да продадут вола живаго, и да разделят цену его, и вола умершаго да разделят:

³⁶аще же знаемь есть вол, яко бодлив есть прежде вчерашняго и третияго дне, и глаголаша господину его, и той не заключит его: да отдаст вола за вола, мертвый же ему да будет.