Read Елизаветинская Библия, 1751 Исход 22 Bible Online

Исход 22 - Елизаветинская Библия, 1751 bible

Исход 22

¹Аще же кто украдет телца или овцу, и заколет или продаст, пять телцев да воздаст за телца и четыри овцы за овцу.

²Аще же в подкопании обрящется тать, и язвен умрет, несть ему убийство:

³аще же взыдет солнце над ним, повинен есть, умрет за него: аще же не имать имения, да продастся за татьбу:

⁴аще же ят будет, и обрящется в руце его украденое от осляте до овцы живо, сугубо да отдаст я.

⁵Аще же кто потравит ниву или виноград, и пустит скот свой пастися на чужей ниве, да даст от нивы своея по плоду его: аще же всю ниву потравит, лучшая нивы своея и лучшая винограда своего да отдаст.

⁶Аще же изшед огнь обрящет терние и запалит гумно, или класы, или ниву, да отдаст, иже возже огнь.

⁷Аще же кто даст другу сребро или сосуд сохранити, и украдется из дому мужа того, аще обрящется украдый, да воздаст сугубо:

⁸аще же не обрящется украдый, да приидет господин дому пред Бога и да кленется, яко поистинне не слукавствова он о всем положении дружнем.

⁹По всей реченней неправде, о теляти и о осляти и о овце, и о ризе и о всей гибели нанесенней, что убо ни было бы, пред Богом да приидет суд обоих, и обвиненный Богом да отдаст сугубо ближнему.

¹⁰Аще же кто даст другу осля или телца, или овцу, или всяк скот хранити, и умрет или погибнет, или пленено будет, и никтоже увесть,

¹¹клятва да будет Божия между обоими, яко поистинне не слукавствова он о всем ближняго положении, и тако приимет господин его, и да не отдаст:

¹²аще же украдено будет от него, да отдаст господину:

¹³аще же зверь снеде, да ведет его на звероядину, и не отдаст:

¹⁴аще же кто испросит у друга, и погибнет, или умрет, или пленится, господин же его не будет с ним, отдаст:

¹⁵аще же господин его будет с ним, да не отдаст: аще же наемник есть, да будет ему вместо мзды его.

¹⁶Аще же прельстит кто не обручену девицу, и будет с нею, веном да отвенит ю, (и поймет ю) себе в жену:

¹⁷аще же возбраняя возбранит и не восхощет отец ея дати ю ему в жену, сребро да воздаст отцу, елико есть вено девическо.

¹⁸Волхвом живым быти не попустите.

¹⁹Всякаго со скотом бывающа смертию убиете его.

²⁰Иже жертву приносит богом, смертию да потребится, но точию Господу единому.

²¹И пришелца не озлобите, ниже оскорбите его: пришелцы бо бесте в земли египетстей.

²²Всякия вдовы и сироты не озлобите:

²³аще же злобою озлобите я, и возстенавше возопиют ко мне, слухом услышу глас их

²⁴и разгневаюся яростию, и побию вы мечем, и будут жены вашя вдовы, и чада ваша сироты.

²⁵Аще же даси сребро взаем брату нищему иже у тебе, не буди его понуждаяй, ниже наложиши ему лихвы.

²⁶И аще заложит в залог ризу друг твой, до захождения солнца отдаси ему:

²⁷есть бо сия покровение ему, сия едина риза стыдения его, в чем спати будет: аще убо возопиет ко мне, услышу его: милостив бо есмь.

²⁸Богов да не злословиши и князю людий твоих да не речеши зла.

²⁹Начатки от гумна и от точила твоего да не косниши принести (мне): первенцы сынов твоих да даси мне:

³⁰тако сотвориши телцу твоему, и овце твоей, и ослу твоему: седмь дний да будет у матери, в осмый же день да отдаси оное мне.

³¹Люди святи будете ми, и мяса звероядиннаго да не снесте, псом повержете е.