Read Елизаветинская Библия, 1751 Исход 23 Bible Online

Исход 23 - Елизаветинская Библия, 1751 bible

Исход 23

¹Да не приимеши слуха суетна, да не приложишися с неправедным быти свидетель неправеден:

²да не будеши со многими на злобу, да не приложишися ко множеству уклонитися со множайшими, яко превратити суд,

³и нищаго да не помилуеши на суде.

⁴Аще же срящеши говядо врага твоего или осля его заблуждающее, обратив да отдаси ему:

⁵аще же узриши осля врага твоего падшее под бременем его, да не мимоидеши е, но да воздвигнеши е с ним.

⁶Да не превратиши суда нищему в суде его.

⁷От всякаго слова неправеднаго да отступиши: неповинна и праведна да не убиеши, и не оправдиши нечестиваго даров ради,

⁸и да не возмеши даров: дары бо ослепляют очи видящым и погубляют словеса праведна.

⁹И пришелца не оскорбляйте, ни стужите (ему): вы бо весте душу пришелчу, понеже сами бесте пришелцы в земли египетстей.

¹⁰Шесть лет да сееши землю твою и да собереши плоды ея:

¹¹в седмое же оставление да сотвориши и опустиши ю, и да ясти будут убозии языка твоего, останки же да снедят зверие дивии: тако да сотвориши винограду твоему и масличию твоему.

¹²В шесть дний да сотвориши дела твоя, в седмый же день покой: да почиет вол твой и осел твой, и да почиет сын рабы твоея и пришлец.

¹³Вся, елика глаголах вам, сохраните, имен же богов инех не поминайте, ниже да слышатся изо уст ваших.

¹⁴Три краты в лете сотворите ми праздник:

¹⁵праздник опресноков сохраните творити, седмь дний ядите опресноки, якоже заповедах тебе, во время месяца новых плодов, в той бо изшел еси из египта, да не явишися предо мною тощь:

¹⁶и праздник жатвы первородных жит сотвориши от дел твоих, яже посееши на ниве твоей: и праздник скончания при исходе лета в собрании дел твоих, яже от нив твоих.

¹⁷Три краты в лете да явится всяк мужеск пол твой пред Господем Богом твоим.

¹⁸Егда бо изжену языки от лица твоего и разширю пределы твоя, да не пожреши на квасе крове жертвы моея, ниже да долежит тук праздника моего до утрия.

¹⁹Начатки первых жит земли твоея да внесеши в дом Господа Бога твоего. Да не свариши ягняте во млеце матере его.

²⁰И се, аз послю ангела моего пред лицем твоим, да сохранит тя на пути, яко да введет тя в землю, юже уготовах тебе:

²¹вонми себе и послушай его, и не ослушайся его: не обинется бо тебе, имя бо мое есть на нем:

²²аще слухом послушаеши гласа моего и сотвориши вся, елика аз заповедаю тебе, и сохраниши завет мой, будете ми люди избранни от всех язык: моя бо есть вся земля, вы же будете ми царское священие и язык свят. Сия словеса да речеши сыном израилевым. Аще слухом послушаеши гласа моего и сотвориши вся, елика реку тебе, враг буду врагом твоим и сопротивлюся сопротивником твоим.

²³Пойдет бо ангел мой наставляяй тя и введет тя ко аморрею и хеттею, и ферезею и хананею, и гергесею и евею и иевусею, и потреблю их (от лица вашего):

²⁴да не поклонишися богом их, ниже послужиши им: да не сотвориши по делом их, но разорением разориши и сокрушением сокрушиши капища их,

²⁵и да послужиши Господу Богу твоему: и благословлю хлеб твой и вино твое и воду твою, и отвращу болезнь от вас.

²⁶Не будет безчаден, ниже неплоды на земли твоей: число дний твоих исполняя исполню.

²⁷И страх послю ведущий тя, и устрашу вся языки, в няже ты входиши к ним, и дам вся сопротивники твоя в бегуны:

²⁸и послю шершни пред тобою, и изжену аморреи и евеи, и иевусеи и хананеи и хеттеи от тебе:

²⁹не изжену их в лете единем, да не будет земля пуста, и мнози будут на тя звери земнии:

³⁰помалу помалу изжену их от тебе, дондеже возрастеши и наследиши землю.

³¹И положу пределы твоя от чермнаго моря до моря филистимля, и от пустыни до реки великия евфрата, и предам в руце ваши седящих на земли и изжену их от тебе:

³²да не смесишися с ними, и с боги их да не завещаеши завета,

³³и да не останутся на земли твоей, да не сотворят тя согрешити ко мне: аще бо поработаеши богом их, сии будут тебе в соблазн.