Read Елизаветинская Библия, 1751 Исход 24 Bible Online

Исход 24 - Елизаветинская Библия, 1751 bible

Исход 24

¹И моисею рече: взыди ко Господу ты и аарон, и надав и авиуд и седмьдесят старец израилевых, и да поклонятся издалече Господу:

²и да приступит моисей един к Богу, они же да не приступят: и людие с ними да не взыдут.

³Прииде же моисей и поведа людем вся словеса Божия и оправдания. Отвещаша же вси людие гласом единым, глаголюще: вся словеса, яже глагола Господь, сотворим и послушаем.

⁴И написа моисей вся словеса Господня: обутрев же моисей заутра, созда олтарь под горою, и дванадесять камений в дванадесять племен израилевых:

⁵и посла юношы сынов израилевых, и принесоша всесожжения, и пожроша жертву спасения Господу Богу телцы.

⁶Взем же моисей половину крове, влия в чашы, половину же крове возлия на олтарь,

⁷и взем книгу завета, прочте людем во ушы. И рекоша: вся, елика глагола Господь, сотворим и послушаем.

⁸Взем же моисей кровь, окропи люди и рече: се, кровь завета, егоже завеща Господь к вам о всех словесех сих.

⁹И взыде моисей и аарон, и надав и авиуд и седмьдесят от старец израилевых,

¹⁰и видеша место, идеже стояше Бог израилев: и под ногама его яко дело камене сапфира, и яко видение тверди небесныя чистотою.

¹¹И от избранных израилевых не повредися ни един: и явишася на месте Божии, и ядоша, и пиша.

¹²И рече Господь к моисею: взыди ко мне на гору и стани тамо, и дам ти скрижали каменныя, закон и заповеди, яже написах законоположити им.

¹³И востав моисей и иисус предстоявый ему, взыдоша на гору Божию

¹⁴и старцем реша: пождите в молчании зде, дондеже возвратимся к вам: и се, аарон и ор с вами: аще кому случится суд, да идут к ним.

¹⁵И взыде моисей на гору, и покры облак гору,

¹⁶и сниде слава Божия на гору синайскую, и покры ю облак шесть дний. И воззва Господь моисеа в день седмый из среды облака:

¹⁷обличие же славы Господни, яко огнь пламенуя на версе горы, пред сыны израилевы.

¹⁸И вниде моисей в среду облака и взыде на гору, и бе тамо на горе четыредесять дний и четыредесять нощей.