Read Елизаветинская Библия, 1751 Исход 25 Bible Online

Исход 25 - Елизаветинская Библия, 1751 bible

Исход 25

¹И рече Господь к моисею, глаголя:

²рцы сыном израилевым, и да возмут ми начатки от всех, яже угодна будут сердцу их, да возмете начатки моя.

³Сей же есть начаток, егоже возмете от них: злато и сребро и медь,

⁴и синету и багряницу, и червленицу сугубу (пряденую), и виссон сканый, и власы козия,

⁵и кожы овни очервленены, и кожы сини, и древа негниющая,

⁶и елей в свещение, фимиам во елей помазания и в сложение фимиама,

⁷и камени сардийския, и камени в ваяние на епомиду и подир.

⁸И да сотвориши ми освящение, и явлюся в вас:

⁹и сотвориши ми по всему, елика аз покажу тебе на горе, образ скинии и образ всех сосудов ея: сице да сотвориши.

¹⁰И сотвориши кивот свидения от древ негниющих, двою лактий и пол в долготу, и лактя и пол в широту, и лактя и пол в высоту:

¹¹и позлатиши его златом чистым, внутрьуду и внеуду позлатиши его, и сотвориши верху его венец злат витый окрест:

¹²и слиеши ему четыри колца злата, и возложиши на четыри страны его, два колца на едину страну, и два на другую страну.

¹³Сотвориши же носила от древа негниюща и позлатиши я златом чистым:

¹⁴и вложиши носила в колца, яже на странах кивота, носити ими кивот:

¹⁵в колцах кивота да будут носила не зыблющеся:

¹⁶и вложиши в кивот свидения, яже дам тебе.

¹⁷И да сотвориши очистилище покров от злата чиста, двою лактий и пол в долготу, лактя же и пол в широту:

¹⁸и сотвориши два херувима злата изваянна, и возложиши я от обоих стран очистилища:

¹⁹да сотворятся херувими, един от страны сея и другий от страны другия очистилища, и сотвориши два херувима на обоих странах:

²⁰да будут херувими распростирающе крила верху, соосеняюще крилами своими над очистилищем, и лица их ко другъдругу, на очистилище будут лица херувимска:

²¹и да возложиши очистилище на кивот верху, и в кивот да вложиши свидения, яже дам тебе.

²²И познан буду тебе оттуду, и возглаголю тебе с верху очистилища между двема херувимы, иже суть над кивотом свидения, и по всем, елика аще заповем тебе к сыном израилевым.

²³И сотвориши трапезу от древ негниющих, двою лактий в долготу, и лактя в широту, и лактя и пол в высоту:

²⁴и позлатиши ю златом чистым, и сотвориши ей витое обложение златое окрест, и сотвориши ей венец длани окрест,

²⁵и сотвориши витое обложение венцу окрест.

²⁶И сотвориши четыри колца злата, и возложиши четыри колца на четыри страны ног ея под венец:

²⁷и да будут колца на влагалища носилам, яко воздвизати ими трапезу.

²⁸И сотвориши носила ея от древ негниющих, и позлатиши я златом чистым, и воздвизатися будет на них трапеза.

²⁹И сотвориши блюда ея и фимиамники, и возливалники и чашы, имиже возливати будеши: от злата чиста да сотвориши я.

³⁰И возлагати будеши на трапезу хлебы предложения предо мною присно.

³¹И да сотвориши светилник от злата чиста, изваян да сотвориши светилник: стебль его и ветви, и чашы и крузи и крины от него да будут:

³²шесть же ветвий исходящих от стран, три ветви светилника от страны его единыя и три ветви светилника от страны вторыя:

³³и три чашы во образ ореха, на единей ветви круг и крин: тако шести ветвам исходящым от светилника:

³⁴и на светилнике четыри чашы во образ ореха, на единей ветви крузи и крины его:

³⁵круг под двема ветвми от него, и круг под четырми ветвми от него: тако шести ветвам исходящым от светилника: и на светилнике четыри чашы во образ ореха:

³⁶крузи и ветви от него да будут: весь изваян от единаго злата чиста.

³⁷И да сотвориши светил его седмь, и поставиши светила его, и светити будут от единаго лица его:

³⁸и щипцы его, и подставы его от злата чиста сотвориши:

³⁹талантом злата чиста да сотвориши вся сосуды сия.

⁴⁰Виждь, да сотвориши по образу показанному тебе на горе.