Read Елизаветинская Библия, 1751 Исход 30 Bible Online

Исход 30 - Елизаветинская Библия, 1751 bible

Исход 30

¹И да сотвориши олтарь кадилный от древ негниющих:

²и сотвориши и лактя в долготу и лактя в широту, четвероуголен да будет, и двою лактий в высоту: от него да будут роги его.

³И позлатиши златом чистым огнище его, и стены его около, и роги его: и да сотвориши ему витый венец злат около.

⁴И два колца злата чиста да сотвориши под витым венцем его на обою углу, да сотвориши на обоих странах: и будут колца носилам, якоже подимати оный ими.

⁵И да сотвориши носила от древес негниющих, и позлатиши я златом:

⁶и да положиши его прямо завесы, сущия у кивота свидения, в нихже познан буду тебе оттуду.

⁷И да кадит над ним аарон фимиамом сложеным благовонным рано рано: егда устрояет светила, да кадит над ним:

⁸и егда вжигает аарон светила с вечера, да кадит над ним: фимиам всегдашний присно пред Господем в роды их:

⁹и да не принесеши над него фимиама инаго: приношения, жертвы и возлияния да не пролиеши на него.

¹⁰И да очистит над ним аарон у рогов его единою в лето: от крове очищения грехов умилостивления единою в лето да очистит его в роды их: святое святых есть Господу.

¹¹И рече Господь к моисею, глаголя:

¹²аще возмеши исчисление сынов израилевых в пресмотрении их, и дадят кийждо искупление за душу свою Господу, и не будет в них падения в пресмотрении их.

¹³И сие есть, еже дадят, елицы аще приступят в пресмотрение, полдидрахмы, еже есть по дидрахме святей: двадесять цат дидрахма: пол же дидрахмы, дань Господу.

¹⁴Всяк входяй в пресмотрение от двадесяти лет и вышше, да дадут дань Господу:

¹⁵богатый да не приложит, и нищий да не умалит от полудидрахмы, егда дают дань Господу (от сынов израилевых), еже умоляти о душах ваших.

¹⁶И да возмеши сребро дани от сынов израилевых, и даси е на соделание скинии свидения: и да будет сыном израилевым память пред Господем, еже умоляти о душах ваших.

¹⁷И рече Господь моисею, глаголя:

¹⁸сотвори умывалницу медяну и стояло ей медяно, еже умыватися, и да поставиши ю между скиниею свидения и между олтарем, и да влиеши в ню воду:

¹⁹и да умывает аарон и сынове его из нея руки своя и ноги водою:

²⁰егда входят в скинию свидения, да омыются водою, и не умрут: или егда приходят ко олтарю служити и приносити всесожжения Господу,

²¹умыют руце и нозе водою, егда входят в скинию свидения, да не умрут, и да будет им законно вечно, ему и родом его по нем.

²²И рече Господь к моисею, глаголя:

²³и ты возми ароматы, цвет смирны избранныя пять сот сиклев, и киннамома благовонна пол сего, двести пятьдесят, и трости благовонныя двести пятьдесят,

²⁴и касии пять сот сиклев святаго, и елеа от маслин (меру) ин,

²⁵и сотвориши сей елей помазание святое, миро помазателное художеством мироварца: елей помазание святое будет,

²⁶и да помажеши от него скинию свидения, и кивот скинии свидения,

²⁷и вся сосуды ея, и светилник и вся сосуды его, и олтарь кадилный,

²⁸и олтарь всесожжения и вся его сосуды, и трапезу и вся ея сосуды, и умывалницу и стояло ея,

²⁹и освятиши я, и будут святая святых: всяк прикасаяйся им освятится:

³⁰и аарона и сыны его помажеши, и освятиши я священнодействовати мне:

³¹и сыном израилевым да речеши, глаголя: елей масть помазания свят да будет сей вам в роды вашя:

³²плоть человеча да не помажется (им), и по сложению сему да не сотворите сами себе иного сице: свят есть и освящение будет вам:

³³иже аще сотворит сице, и иже аще даст от него иноплеменнику, потребится от людий своих.

³⁴И рече Господь к моисею: возми себе ароматы, стакти, ониха и халвана благовонна и ливана чистаго: все то в равну меру да будет:

³⁵и да сотворят в нем фимиам мироварный, дело мироварца смешеное, чисто, дело сто:

³⁶и раздробиши от сих по тонку, и положиши прямо свидению в скинии свидения, отюнудуже познан буду тебе тамо: святое святых будет вам фимиам:

³⁷по сложению сему да не сотворите себе сами, освящение будет вам от Господа:

³⁸иже аще сотворит сице, еже обоняти от него, погибнет душа того от людий своих.