Read Елизаветинская Библия, 1751 Исход 31 Bible Online

Исход 31 - Елизаветинская Библия, 1751 bible

Исход 31

¹И рече Господь к моисею, глаголя:

²се, нарекох именем веселеила сына урии, сына орова, от племене иудина,

³и наполних его Духом Божиим премудрости и смышления и ведения, во всяком деле разумети

⁴и архитектонствовати, делати злато и сребро и медь, и синету и багряницу, и червленицу прядену и виссон сканый,

⁵и каменное дело, и различная древоделства делати во всех делех:

⁶и аз дах его и елиава сына ахисамахова от племене данова, и всякому смысленному сердцем дах смысл, и потрудятся, и сотворят вся, елика заповедах тебе:

⁷скинию свидения и кивот завета, и очистилище еже верху его, и утварь скинии,

⁸и жертвенники, и трапезу и вся сосуды ея, и светилник чистый и вся сосуды его,

⁹и умывалницу и стояло ея,

¹⁰и ризы служебныя аароновы и ризы сынов его, еже священнодействовати мне,

¹¹и елей помазания, и фимиам сложения святаго: по всем, елика заповедах тебе, сотворят.

¹²И рече Господь к моисею, глаголя:

¹³и ты заповеждь сыном израилевым, глаголя: смотрите и субботы моя сохраните: есть бо знамение между мною и вами в роды вашя, да увесте, яко аз Господь освящаяй вас:

¹⁴и сохраните субботу, яко свята сия есть Господу и вам: осквернивый ю смертию умрет: всяк, иже сотворит в ню дело, потребится душа та от среды людий своих:

¹⁵шесть дний да сотвориши дела, в день же седмый суббота, покой свят Господу: всяк, иже сотворит дело в седмый день, смертию умрет:

¹⁶и да сохранят сынове израилевы субботы держати я в роды их:

¹⁷завет вечен во мне и в сынех израилевых, знамение есть во мне вечное: яко в шести днех сотвори Господь небо и землю, в седмый же день преста, и почи.

¹⁸И даде (Бог) моисею, егда преста глаголя ему на горе синайстей, две скрижали свидения, скрижали каменны написаны перстом Божиим.