Read Елизаветинская Библия, 1751 Исход 34 Bible Online

Исход 34 - Елизаветинская Библия, 1751 bible

Исход 34

¹И рече Господь к моисею: истеши себе две скрижали каменны, якоже и первыя, и взыди ко мне на гору: и напишу на скрижалех словеса, яже бяху на скрижалех первых, яже сокрушил еси:

²и буди готов заутра, и взыдеши на гору синайскую и предстанеши мне тамо на версе горы:

³и да никтоже взыдет с тобою, ниже да явится на всей горе: и овцы и говяда да не пасутся близ горы тоя.

⁴И истеса две скрижали каменны, якоже и первыя: и утренневав моисей заутра, взыде на гору синайскую, якоже завеща ему Господь: и взя моисей с собою две скрижали каменныя.

⁵И сниде Господь во облаце, и предста ему тамо моисей, и призва именем Господним.

⁶И мимоиде Господь пред лицем его и воззва: Господь, Господь Бог щедр и милостив, долготерпелив и многомилостив и истинен,

⁷и правду храняй, и творяй милость в тысящы, отемляй беззакония и неправды и грехи, и повиннаго не очистит, наводяй грехи отцев на чада, и на чада чад, до третияго и четвертаго рода.

⁸И потщався моисей, приник на землю, поклонися Богу

⁹и рече: аще обретох благодать пред тобою, да идет Господь мой с нами: людие бо жестоковыйнии суть: и отимеши ты грехи нашя и беззакония наша, и будем твои.

¹⁰И рече Господь к моисею: се, аз полагаю тебе завет пред всеми людьми твоими, и сотворю славная, яже не быша по всей земли и во всех языцех: и узрят вси людие, в нихже еси ты, дела Господня, яко чудна суть, яже аз сотворю тебе:

¹¹внемли ты вся, елика аз заповедаю тебе: се, аз изжену пред лицем вашим аморреа и хананеа, и хеттеа и ферезеа, и евеа и гергесеа и иевусеа:

¹²внемли себе, да не когда завещаеши завет седящым на земли, в нюже внидеши, да не будет соблазн в вас:

¹³капища их разорите и кумиры их сокрушите, и дубравы их посецыте, и изваяная богов их сожжите огнем,

¹⁴не бо поклонитеся богом иным: ибо Господь Бог ревниво имя, Бог ревнив есть:

¹⁵да не когда завещаеши завет седящым на земли, и соблудят вслед богов их, и пожрут богом их, и призовут тя, и снеси от жертв их:

¹⁶и поймеши от дщерей их сыном твоим, и от дщерей твоих даси сыном их, и соблудят дщери твоя вслед богов их, и сынове твои соблудят вслед богов их:

¹⁷и богов слияных да не сотвориши себе:

¹⁸и праздник опресночный да сохраниши: седмь дний да яси опресноки, якоже заповедах тебе, во время в месяце новых плодов: в месяце бо новых плодов изшел еси от земли египетския:

¹⁹всяко разверзающее ложесна мужеск мне пол (да будет), всяко первородное телца и первородное овцы:

²⁰и первородное осляте искупиши овцею: аще же не искупиши е, цену да даси его: всякаго первенца от сынов твоих да искупиши, да не явишися предо мною тощь:

²¹в шесть дний да делаеши, в седмый же день да почиеши, от сеятвы и жатвы да почиеши,

²²и праздник седмиц да сотвориши ми, начало жатвы пшеницы, и праздник собрания посреде лета:

²³в три времена лета да явится всяк мужеск пол твой пред Господем Богом израилевым:

²⁴егда бо изжену языки от лица твоего и разширю пределы твоя, никтоже возжелает земли твоея, егда приидеши явитися пред Господем Богом твоим в три времена лета:

²⁵да не заколеши с квасом крове жертв моих, и да не прележит до утрия жертва праздника пасхи:

²⁶первородная жит земли твоея да внесеши в дом Господа Бога твоего: да не свариши агнца во млеце матере его.

²⁷И рече Господь к моисею: напиши себе словеса сия, в словесех бо сих положих тебе завет и израилю.

²⁸И бе тамо моисей пред Господем четыредесять дний и четыредесять нощей: хлеба не яде и воды не пи: и написа (моисей) на скрижалех словеса сия завета, десять словес.

²⁹Сходящу же моисею с горы синайския, и обе скрижали в руку моисеову: сходящу же ему с горы, и моисей не ведяше, яко прославися зрак плоти лица его, егда глаголаше с ним.

³⁰И виде аарон и вси сынове израилевы моисеа, и бяше прославлен зрак плоти лица его: и убояшася приступити к нему.

³¹И воззва их моисей, и обратишася к нему аарон и вси князи сонма: и глагола моисей к ним.

³²И по сих приидоша к нему вси сынове израилевы: и заповеда им вся, елика глагола к нему Господь на горе синайстей.

³³И егда преста глаголя к ним, возложи на лице свое покров.

³⁴Егда же вхождаше моисей пред Господа глаголати к нему, снимаше покров, дондеже исхождаше: и изшед глаголаше ко всем сыном израилевым, елика заповеда ему Господь.

³⁵И видеша сынове израилевы лице моисеово, яко прославися: и возлагаше моисей покров на лице свое, дондеже внидет глаголати с ним.