Read Елизаветинская Библия, 1751 Исход 35 Bible Online

Исход 35 - Елизаветинская Библия, 1751 bible

Исход 35

¹И собра моисей весь сонм сынов израилевых и рече к ним: сия словеса, яже глагола Господь творити я:

²шесть дний сотвориши дела, в день же седмый почиеши, свята суббота, покой Господу: всяк творяй дело в ню, да умрет:

³да не возгнетите огня во всех домех ваших в день субботный: аз Господь.

⁴И рече моисей ко всему сонму сынов израилевых, глаголя: сие слово, еже завеща Господь глаголя:

⁵возмите от себе самих участие Господу: всяк по воли сердца своего да принесет начатки Господу, злато, сребро, медь,

⁶синету, багряницу, червленицу сугубу спрядену, и виссон сканый и волну козию,

⁷и кожы овни очервлены, и кожы сини, и древеса негниюща,

⁸и елей во свещение, и фимиам в елей помазания, и в сложение фимиама:

⁹и камени сардийски, и камени в ваяние на ризу верхнюю и на подир:

¹⁰и всяк премудрый сердцем в вас шед да делает вся, елика заповеда Господь:

¹¹скинию и завесы, и покровы и разворы, и колки и вереи, и столпы и стояла:

¹²и кивот свидения и носила его, и очистилище его и завесу, (и опоны двора, и столпы его, и камени смарагдовы, и фимиам и елей помазания,)

¹³и трапезу и носила ея, и вся сосуды ея, и хлебы предложения, (и олтарь и вся сосуды его,)

¹⁴и светилник света и вся сосуды его, и светила его и елей светилный,

¹⁵и олтарь кадилный и носила его, и елей помазания, и фимиам сложения, и завесу дверий скинии,

¹⁶и олтарь всесожжения, и огнище его медяно и носила его, и вся сосуды его, и умывалницу, и стояло ея,

¹⁷и опоны двора, и столпы его и стояла его, и завесу дверий двора,

¹⁸и колки скинии, и колки двора, и ужы их:

¹⁹и ризы святыя аарона жерца, и ризы, в нихже служити имут во святем, и ризы сыном аароновым священства (и елей помазания, и фимиам сложения).

²⁰И изыде весь сонм сынов израилевых от моисеа.

²¹И принесоша кийждо, яже возлюби сердце их, и якоже возмнеся души их, принесоша участие Господу на вся дела скинии свидения, и на вся сосуды ея, и на вся ризы святилища:

²²и принесоша мужие от жен своих, кийждо, якоже помысли умом, принесоша печати и усерязи, и перстни и пленицы, и мониста и всяк сосуд злат: и вси елицы принесоша участие злата Господу,

²³и всяк у негоже обретеся синета и багряница, и червленица и виссон, и кожы сини и кожы сини очервлены, (и кожы козия) принесоша:

²⁴всяк отделяяй участие, сребро и медь, принесоша участия Господу: и у нихже обретошася древеса негниющая, на вся соделования сосудов принесоша:

²⁵и всяка жена мудрая умом рукама прясти, принесе пряденая, синету и багряницу и червленицу и виссон:

²⁶и вся жены, имже возлюбися во уме их, хитростию спрядоша волну козию:

²⁷и князи принесоша камени смарагдовы и камени на совершение ризе верхней, и на слово,

²⁸и на сложение, и на елей помазания, и на сложение фимиама:

²⁹и всяк муж, или жена, имже наносяше ум их, вшедшим творити вся дела, елика заповеда Господь творити я моисеом, принесоша сынове израилевы участие Господу.

³⁰И рече моисей сыном израилевым: се, нарече Бог именем веселеила сына уриина, сына орова, от племене иудина,

³¹и наполни его Духа Божия, премудрости и разума, и умений всех,

³²архитектонствовати во всех делесех древоделания, творити злато и сребро и медь,

³³и ваяти камени, и делати древо, и творити по всему делу премудрости:

³⁴и преуспевати даде во уме ему и елиаву ахисамахову, от племене данова:

³⁵и наполни их премудрости, ума, еже разумети творити вся дела святыни, ткания и пестрения ткати червленицею и багряницею и виссоном, творити всякое дело художества различна.