Read Елизаветинская Библия, 1751 Исход 36 Bible Online

Исход 36 - Елизаветинская Библия, 1751 bible

Исход 36

¹И сотвори веселеил и елиав, и всяк мудрый умом, емуже дана есть премудрость и хитрость в них, разумети творити вся дела, яже ко святыни надлежащая, по всем, елика заповеда Господь.

²И призва моисей веселеила и елиава и вся имущыя премудрость, имже даде Бог разум в сердцы, и вся волею хотящыя приходити к делам, еже совершати я:

³и взяша от моисеа вся участия, яже принесоша сынове израилевы на вся дела святыни творити я: и тии приимаху еще приносимая от приносящих заутра заутра.

⁴И прихождаху вси мудрии, иже творяху дела святыни, кийждо по своему делу, еже сами делаху:

⁵и рекоша моисею, яко много приносят людие свыше дел, елика заповеда Господь сотворити.

⁶И повеле моисей, и проповеда в полце, глаголя: муж и жена ктому да не делают на начатки святыни. И возбранени быша людие ктому приносити.

⁷И дела быша им доволна на строение творити, и преизбыша.

⁸И сотвори всяк премудрый в делающих ризы святыни, яже суть аарону иерею, якоже заповеда Господь моисею.

⁹И сотвориша ризу верхнюю от злата и синеты, и багряницы и червленицы прядены и виссона сканаго:

¹⁰и изрезаша дщицы златы аки власы, еже соткати с синетою и с багряницею, и с червленицею пряденою и с виссоном сканым: дело тканое сотвориша е.

¹¹Ризы верхния придержащыяся от обоих стран,

¹²дело тканно, между собою сплетено: от него сотвориша е по его творению, от злата и синеты, и багряницы и червленицы спрядены и виссона сканаго, якоже заповеда Господь моисею.

¹³И сотвориша оба камени смарагдовы состеганы вервию и обложены златом, изваяны и вырезаны ваянием печати, от имен сынов израилевых:

¹⁴и возложиша я на рамена ризы верхния камение в память сынов израилевых, якоже заповеда Господь моисею.

¹⁵И сотвориша слово, дело тканно пестротою, по делу ризы верхния, от злата и синеты, и багряницы и червленицы спрядены и виссона сканаго,

¹⁶четвероуголно сугубо сотвориша логион пяди в долготу, и пяди в широту, сугубо:

¹⁷и сшиста на нем швением по три камени четырми ряды: ряд камений: сардий и топазий и смарагд, ряд един:

¹⁸и ряд вторый, анфракс и сапфир и иаспис:

¹⁹и ряд третий, лигирий и ахат и амефист:

²⁰и ряд четвертый, хрисолиф и вириллий и онихий, окованы около златом и всаждени в злате:

²¹и камение бяху от имен сынов израилевых дванадесять, по именам их изваяно в печати, кийждо своим именем в дванадесять племен.

²²И сотвориша над логионом тресны сплетены, дело плетеное от злата чиста:

²³и сотвориша два щитца злата и два колца злата, и возложиша два колца злата на оба конца логиона:

²⁴и вложиша плетеницы златы в колца, со обоих стран логиона,

²⁵и в два сложения две плетеницы, и возложиша на два щитца: и возложиша на рамена ризы верхния, противу лицем к лицу.

²⁶И сотвориша два колца злата, и возложиша на два крила на край логиона, и на край созади верхния ризы, внутрьуду:

²⁷и сотвориша два колца злата, и положиша на оба рамена ризы верхния с низу его на лице по согбению свыше состава ризы верхния:

²⁸и стягнуша логион колцами, яже на нем, с колцами верхния ризы сложеными, из синеты сплетенными, во ткание ризы верхния, да не низпускается логион от ризы верхния, якоже заповеда Господь моисею.

²⁹И сотвориша исподнюю ризу, яже под верхнюю, дело тканно, все синее:

³⁰ожерелие же во внутренней ризе, на среде швенно, сплетено, ометы имущо около ожерелие неразлучено.

³¹И сотвориша на омете ризы внутренния долу яко процветающаго шипка пугвицы от синеты и багряницы, и червленицы прядены и виссона сканаго.

³²И сотвориша звонцы златы, и возложиша звонцы на ометы ризы внутренния окрест между пугвицами:

³³звонец злат и пугвица на омете внутренния ризы окрест, к служению, якоже повеле Господь моисею.

³⁴И сотвориша ризы виссонныя дело тканно, аарону и сыном его,

³⁵и клобуки из виссона, и увясло из виссона, и надраги из виссона сканаго,

³⁶и поясы их из виссона и синеты, и багряницы и червленицы прядены, дело пестрящаго, якоже заповеда Господь моисею.

³⁷И сотвориша дщицу злату, отделение святыни от злата чиста, и написаша на ней писмена изваяна печатию: освящение Господу:

³⁸и возложиша ю на омет синь, еже бы лежати на увясле свыше, якоже заповеда Господь моисею.