Read Елизаветинская Библия, 1751 Исход 37 Bible Online

Исход 37 - Елизаветинская Библия, 1751 bible

Исход 37

¹И сотвориша скинии десять опон:

²двадесять и осмь лакот долгота единыя опоны, таяжде бяше всем, и четырех лакот широта опоны единыя.

³И сотвориша завесу от синеты и багряницы, и червленицы спрядены и виссона сканаго, дело швенно херувимы:

⁴и возложиша ю на четыри столпы негниющыя позлащены златом, и верхи их златы, и стояла их четыри сребряна.

⁵И сотвориша завесу дверем скинии свидения от синеты и багряницы, и червленицы спрядены и виссона сканаго, дело швенно херувимы,

⁶и столпы их пять и крючки их: и главицы их и верхи их позлатиша златом, и стояла их пять медяна.

⁷И сотвориша двор к югу, опоны двора из виссона сканаго, сто на сто:

⁸и столпы их двадесять, и стояла их двадесять медяна:

⁹и страна к северу, сто на сто: и страна к югу, сто на сто, и столпы их двадесять, и стояла их двадесять медяна:

¹⁰и страна к морю, опоны пятидесят лактей, столпы их десять, и стояла их десять:

¹¹и страна к востоку пятидесят лактей,

¹²опоны пятинадесяти лактей, яже созади, и столпы их три, и стояла их три.

¹³И на вторей задней стране сюду и сюду у дверий двора, опоны пятинадесяти лактей: столпы их три, и стояла их три.

¹⁴Вся опоны скинии из виссона сканаго,

¹⁵и стояла столпов их медяна, и петли их сребряны, и главицы их посребрены сребром, и столпы их посребрены сребром, вси столпи двора.

¹⁶И завеса дверий двора дело пестрящаго, из синеты и багряницы, и червленицы прядены и виссона сканаго: двадесяти лактей долгота, и высота и широта пяти лактей, равны опонам двора:

¹⁷и столпы их четыри, и стояла их четыри медяна, и петли их сребряны, и главицы их посребрены сребром:

¹⁸и вси колки двора около медяны, и тии посребрены сребром.

¹⁹И сие сочинение скинии свидения, якоже заповедано бысть моисею, служению быти левитов чрез ифамара сына аароня иереа:

²⁰и веселеил, сын уриев, от племене иудина, сотвори, якоже заповеда Господь моисею,

²¹и елиав, сын ахисамахов, от племене данова, иже созидаше тканыя вещи и швеныя и пестрыя, еже ткати из червленицы и виссона.