Read Елизаветинская Библия, 1751 Исход 40 Bible Online

Исход 40 - Елизаветинская Библия, 1751 bible

Исход 40

¹И рече Господь к моисею, глаголя:

²в день первый месяца перваго, в новомесячие поставиши скинию свидения:

³и да положиши кивот свидения, и покрыеши кивот завесою:

⁴и внесеши трапезу, и предложиши предложение ея: и внесеши светилник, и поставиши светила его:

⁵и положиши олтарь златый, в каждение пред кивотом свидения, и возложиши покров завесы над дверию скинии свидения:

⁶и олтарь приношений поставиши у дверий скинии свидения,

⁷и поставиши умывалницу между скиниею свидения и между олтарем, и влиеши в ню воду:

⁸и поставиши двор окрест и даси завесу дверий двора:

⁹и возмеши елей помазания и помажеши скинию и вся яже в ней, и освятиши ю и вся сосуды ея, и будут свята:

¹⁰и да помажеши олтарь приношений и вся сосуды его, и освятиши олтарь, и будет олтарь святый святых:

¹¹и помажеши умывалницу и стояло ея и освятиши ю:

¹²и да приведеши аарона и сынов его пред двери скинии свидения и измыеши их водою:

¹³и да облечеши аарона в ризы святыя и помажеши его, и освятиши его, и да жрет мне:

¹⁴и сыны его да приведеши и облечеши я в ризы,

¹⁵и да помажеши я, якоже помазал еси отца их, да жрут мне: и будет, еже быти им помазанию жречества во век, в роды их.

¹⁶И сотвори моисей вся, елика заповеда ему Господь, сице сотвори.

¹⁷И бысть в первый месяц во второе лето исходящым им от египта, в новомесячии ста скиния.

¹⁸И постави моисей скинию, и подложи стояла ея, и возложи главицы, и вложи разворы, и постави столпы,

¹⁹и простре опоны на скинию, и возложи покрывало скинии на ню с верху, якоже заповеда Господь моисею:

²⁰и взем свидения, вложи в кивот, и подстави ноги под кивотом, и возложи очистилище над кивотом:

²¹и внесе кивот в скинию, и возложи покров завесы, и закры кивот свидения, якоже заповеда Господь моисею:

²²и постави трапезу в скинии свидения, на страну скинии свидения, яже к северу, внеуду завесы скинии:

²³и возложи на ню хлебы предложения пред Господем, якоже заповеда Господь моисею:

²⁴и постави светилник в скинии свидения прямо трапезы, на страну скинии, яже к югу:

²⁵и постави свещники его пред Господем, якоже заповеда Господь моисею:

²⁶и постави олтарь златый в скинии свидения противу завесы,

²⁷и покади над ним фимиамом сложения, якоже заповеда Господь моисею:

²⁸и положи завесу дверий скинии,

²⁹и олтарь приношений постави у дверий скинии покрова свидения, и вознесе на нем всесожжение и жертву, якоже заповеда Господь моисею:

³⁰и сотвори умывалницу между скиниею свидения и между жертвенником,

³¹и влия в ню воду, да умывают от нея моисей и аарон и сынове его руки своя и ноги, входящым им в скинию свидения:

³²или приходяще к жертвеннику служити, умывахуся от нея, якоже заповеда Господь моисею:

³³и постави двор окрест скинии и олтаря и положи завесу двора. И сконча моисей вся дела.

³⁴И покры облак скинию свидения, и славы Господни исполнися скиния,

³⁵и не можаше моисей внити в скинию свидения, яко осеняше над нею облак, и славы Господни исполнися скиния:

³⁶егда же восхождаше облак от скинии, воздвизахуся сынове израилевы со имением своим:

³⁷аще же не взыде облак, не воздвизахуся даже до дне, в оньже взыдет облак:

³⁸облак бо Господнь бяше над скиниею в день, и огнь бяше над нею в нощь пред всем израилем во всех путешествиих их.