Read Елизаветинская Библия, 1751 Исход 6 Bible Online

Исход 6 - Елизаветинская Библия, 1751 bible

Исход 6

¹И рече Господь к моисею: се, узриши, что сотворю фараону: рукою бо крепкою отпустит их и мышцею высокою изженет их от земли своея.

²глагола же Бог к моисею и рече ему: аз Господь,

³и явихся аврааму, и исааку, и иакову, Бог сый их, и имене моего Господь не явих им:

⁴и поставих завет мой с ними, яко дати им землю ханаанску, землю пришелствия их, на нейже и обитаху:

⁵аз же услышах стенание сынов израилевых, имже египтяне поработиша их, и помянух завет мой:

⁶иди, рцы сыном израилевым глаголя: аз Господь, и изведу вас от насилия египетска, и избавлю вас от работы (их), и отиму вас мышцею высокою и судом великим,

⁷и прииму вы себе в люди, и буду вам Бог: и уразумеете, яко аз Господь Бог ваш, изведый вас от земли египетския и от насилия египетска:

⁸и введу вас в землю, на нюже прострох руку мою, дати ю аврааму и исааку и иакову: и дам ю вам в наследие, аз Господь.

⁹Глагола же моисей тако сыном израилевым, и не послушаша моисеа от малодушия и от дел жестоких.

¹⁰Рече же Господь к моисею, глаголя:

¹¹вниди, глаголи фараону царю египетскому, да отпустит сыны израилевы из земли своея.

¹²Рече же моисей пред Господем глаголя: се, сынове израилевы не послушаша мене, и како послушает мене фараон? аз же несловесен есмь.

¹³Рече же Господь к моисею и аарону и завеща им внити к фараону царю египетскому, да отпустит сыны израилевы от земли египетския.

¹⁴И сии старейшины домов отечеств их: сынове рувима, первенца израилева, енох и фаллос, асрон и харми: сие племя рувимово.

¹⁵Сынове же симеоновы: иемуил и иамин, и аод и ахин, и саар и саул, иже от финиссины: сия рождения сынов симеоновых.

¹⁶И сия имена сынов левииных по сродством их: гирсон, кааф и мерари: лет же жития левиина сто тридесять седмь.

¹⁷Сии же сынове гирсони: ловени и семей: домове рождения их.

¹⁸Сынове же каафовы: амврам и иссаар, хеврон и озиил: лет же жития каафова сто тридесять три.

¹⁹Сынове же мерарины: мооли и омуси: сии домове рождения левиина по сродством их.

²⁰И поя амврам иохаведу, дщерь брата отца своего, себе в жену, и роди ему аарона и моисеа и мариамь сестру их: лет же жития амврамова сто тридесять седмь.

²¹Сынове же иссааровы: коре и нафек и зехри.

²²Сынове же озииловы: мисаил и елисафан и сегри.

²³Поя же аарон елисавету, дщерь аминадавову, сестру наассонову, себе в жену, и роди ему надава и авиуда, и елеазара и ифамара.

²⁴Сынове же кореовы: асир и елкана и авиасар: сия рождения кореова.

²⁵И елеазар, сын ааронов, поя от дщерей футииловых себе в жену, и роди ему финееса: сия старейшинства отечества левитска по сродством их.

²⁶Сей аарон и моисей, имже рече Бог извести сыны израилевы из земли египетския с силою их.

²⁷Сии суть, иже глаголаста к фараону царю египетскому, еже извести сыны израилевы от земли египетския: сей аарон и моисей,

²⁸в оньже день глагола Господь к моисею в земли египетстей.

²⁹И рече Господь к моисею глаголя: аз Господь: глаголи к фараону царю египетскому, елика аз глаголю к тебе.

³⁰И рече моисей пред Господем: се, аз худогласен есмь, и како послушает мене фараон?