Read Елизаветинская Библия, 1751 Иов 15 Bible Online

Иов 15 - Елизаветинская Библия, 1751 bible

Иов 15

¹Отвещав же елифаз феманитин, рече:

²еда премудрый даст ответ разумен на ветр, и наполни болезнию чрево,

³обличая глаголы, имиже не подобает, и словесы, ихже ни кая польза?

⁴Не и ты ли отринул еси страх? скончал же еси глаголы таковы пред Господем?

⁵Повинен еси глаголом уст твоих, ниже разсудил еси глаголы сильных.

⁶Да обличат тя уста твоя, а не аз, и устне твои на тя возсвидетелствуют.

⁷Что бо? еда первый от человек рожден еси? или прежде холмов сгустился еси?

⁸или строение Господне слышал еси? или в советника тя употреби Бог? и на тя (единаго) ли прииде премудрость?

⁹что бо веси, егоже не вемы? или что разумееши ты, егоже и мы (не разумеем)?

¹⁰И стар и древен есть в нас, старший отца твоего деньми.

¹¹Мало, о нихже согрешил еси, уязвлен еси, вельми выше меры возглаголал еси.

¹²Что дерзостно бысть сердце твое? или что вознесостеся очи твои?

¹³Яко ярость изрыгнул еси пред Господем, изнесл же еси изо уст такова словеса?

¹⁴Кто бо сый человек яко будет непорочен? или аки будущий праведник рожден от жены?

¹⁵Аще во святых не верит, небо же нечисто пред ним,

¹⁶кольми паче мерзкий и нечистый муж, пияй неправды, якоже питие.

¹⁷Возвещу же ти, послушай мене: яже ныне видех, возвещу ти,

¹⁸яже премудрии рекут, и не утаиша отцы их,

¹⁹имже единым дана бысть земля, и не найде иноплеменник на ня.

²⁰Все житие нечестиваго в попечении, лета же изочтена дана сильному,

²¹страх же его во ушесех его: егда мнит уже в мире быти, тогда приидет нань низвращение:

²²да не верует отвратитися от тмы, осужден бо уже в руки железа,

²³учинен же есть в брашно неясытем: весть же в себе, яко ждет падения, день же темен превратит его,

²⁴беда же и скорбь оымет его, якоже военачалник напреди стояй падает,

²⁵яко вознесе руце на Господа, пред Господем же вседержителем ожесточи выю,

²⁶тече же противу ему укоризною в толщи хребта щита своего:

²⁷яко покры лице свое туком своим и сотвори омет на стегнах: (хвала же его укоризна).

²⁸Да вселится же во градех пустых, внидет же в домы ненаселенныя: а яже они уготоваша, инии отнесут.

²⁹Ниже обогатится, ниже останет имение его, не имать положити на землю сени,

³⁰ниже избежит тмы: прозябение его да усушит ветр, и да отпадет цвет его:

³¹да не верит, яко стерпит, тщетная бо сбудутся ему.

³²Посечение его прежде часа растлеет, и леторасль его не облиственеет:

³³да оыман будет якоже недозрелая ягода прежде часа, да отпадет же яко цвет масличия.

³⁴Послушество бо нечестиваго смерть, огнь же пожжет домы мздоимцев:

³⁵во чреве же приимет болезни, сбудется же ему тщета, чрево же его понесет лесть.